Meeqqat angerlarsimaffiup avataanut inissinneqarsimasut nunaqarfeeqqami illuaqqamiit oqorsarneqanngitsumiiteriarlugit, maanna Nuummi najugaqarfinni assigiinngitsuni nuunneqaqattaarput.

Sulisunik ilinniagaqanngitsunik paaqqutarineqarput. Affarliminnit nipituuliortutut, aserorterisutut toqqissisimatitsinngitsutullu unnuaagaluaraangat misigiffineqartarlutik.

Kommuneqarfik Sermersuumi meeqqat angerlarsimaffiup avataanut inissitat isumaginninnikkut pisariaqartitsingaatsiartut takornarialerinermik siornatigut sulialinnit Nuuk Outdoorimit, manna Isunngamik ateqalersumit paarineqartut, KNR-imit oqaluttuarisarpagut.

Allannguisoqarnissaalu suli ungasittoq, meeqqanut, inuusuttunullu naalakkersuisoq, Inuit Ataqatigiinneersoq, Aqqaluaq B. Egede oqarpoq.

- Siullermik meeqqanut angerlarsimaffiup avataanut inissitanut, immikkut ittumik inissiigasuarnermi inatsisinik nutarterinissaq naalakkersuisoqarfimmi suliaralugu aallartipparput. Naatsorsuuterput malillugu ingerlassaguni tassa ukiamut inatsisartut ataatsimiinneranni angumersinissaa naatsorsuutigaarput, taanna oqarpoq.

Inatsisinik erseqqinngitsunik erseqqissaasoqassasoq

Nuuk Outdoorimi pisunut assingusunik pisoqaqqinnginnissaa anguniarlugu inatsisinik allannguisoqartariaqartoq, taassuma isumasiuisitsinermini oqariartuutigivaa. Nutaanik inatsisiliortoqassasoq taassuma taamani neriorsuutigaa.

- Una pisoq – imaannaanngitsutut isigisarput tamatta – uteqqissanngippat taava malittarisassat taakkua aaqqinneqassapput. Taamatut piffissami sivisutigisumi immikkut angerlarsimaffimmi inissiineq illoqarfiup avataani pisinnaajunnaarlugu taavalu aamma meeqqanut illersuutissanik sinaakkutinik pilersitsilluta, Aqqaluaq B. Egede taamanikkut oqarpoq.

Nuuk Outdoorimili pisimasut siunissami nalaanneqaqqinnavianngitsut maanna Aqqaluaq B. Egedep neriorsuutigaa:

- Isumaqarpunga una tamatta nassuerutigisariaqaripput taamatut meeqqanik immikkut inissiinermi pitsaanngippallaamik inatsisitigut inissiisimaneq aaqqinniartariaqaripput ajornartorsiutit uteqqeqqunagit, taanna oqarpoq.

Nuuk Outdoor unammillernartunik takutitsisoq

Illit nammineerlutit Nuuk Outdoor isornartorsiornikuuat, suliffeqarfik taanna suli meeqqanik arfineq marlunnik paarsaqarpoq, tamanna ajunngila?

- Isumaqarpunga ajornartorsiutaammat aaqqiiviginiarlugu sulinerput naalakkersuisoqarfiup pitsaasup tungaanut sammiveqartuusoq, aamma inatsisiliorneq piffissami sivisuumi ingerlanneqartarami taavalu inatsisartut kisimik inatsisiliorsinnaallutik taamaammat naalakkersuisoqarfitsinni uanga naalakkersuisuusutut suliaq ilisimallugu aaqqiivigineqarnissaalu sulissutigalugu ingerlavunga.

Taassuma oqarnera naapertorlugu maanna inatsisit atuuttut kommuninit malinneqartut – takutippaat inatsisit nutaat pisariaqartinneqartut.

- Taamaammat inatsisiliortut inatsisaat naapertorlugit uanga sulisussaavunga, inatsisiliortullu allannguippata aatsaat malitassagut allanngortussaallutik. Taamaammat inatsisissatut siunnersuummik suliaqarnermi massakkut ingerlataqarnerput pitsaasutut isigivara.

- Inatsisit suliarineqaraangamik tusarniutigineqaqqaartussaapput kommuninut tamanut kiffartuussisunullu atuisunut tamanut aamma ulloq unnuarlu angerlarsimaffinnut tamanut isummernissamut inatsisit kukkusaannginneranik naliliinissamut ingerlaqqaartarput taannalu ukioq affaq suliarineqartarluni, suleriaaserput naapertorlugu.