Kommuneqarfik Sermersuup meeqqat angerlarsimaffiup avataanut pinasuartumik inissinneqartut nunaqarfimmi Kapisilinni illuaqqani najugaqartissimagai KNR-ip juullip ukiortaallu akornanni saqqummiupaa. Takornarialerisut suliffeqarfiat Nuuk Outdoor meeqqanik paarsisuusoq saqqummiunneqarpoq.

Kommunip oqarnera naapertorlugu meeqqat Nuummut maanna nuunneqarput, kisianni taakku suneqarnissaannut suli pilersaaruteqartoqanngilaq. Kommunip Nuuk Outdoorimut inissiineq meeqqanut ataavartumik inissiiffissaqalernissamut pappiaqqanik suliarineqarnermi ajornartoornermi aaqqiissutaanerarpaa.

Naak tamanna utaqqiisaarutaasumik aaqqiissutaagaluartoq meeqqat ilaat illuaqqani mikisuni oqorsarsimanngitsunilu qaammatini qulini najugaqarput. Nunaqarfimmiorpassuit meeqqat nuunnerisa kingorna aserorterinerit, tillinniarnerit, gassinik naamaarnerit ikuallatsitsinerillu pisimasut oqaluttuaraat.

Takornarialerisulli meeqqanik pinasuartumik inissinneqartunik paarsinerat Inunnik isumaginninnermi siunnersortitut ilinniarsimasut peqatigiiffianni siulittaasup, Martha Lund Olsenip nunatsinni tamarmi nalinginnaasumik ajornartorsiutaanerarpaa:

- Inissiisarfiit suliassamut nukissaqannginnerat pillugu ajornartorsiut ilisimaneqarluarpoq. Ulloq unnuarlu inissiisarfiit meeqqanik sumiginnarneqarsimasunik isumaginninnissamut pitsaassusaat naammanngitsoq suliamik isumaginnittut maluginiarpaat.

Taassuma ilaasortani – tassa isumaginninnermi siunnersortit – meeqqanik atornerluisuulersimasunik, pinerluuteqartalersimasunik imaluunniit meeqqanut inuusuttunulluunniit allanut nakuusertalersimasunik isumaginninniarnermut atatillugu iliuusissaaleqisartut oqaatigaa.

Ilinniaqqinneq pikkorissarnerlu

Taama pisoqartillugu isumagininnermi siunnersortit meeqqanut inissiiffiusinnaasunik, meeqqat pisariaqartilluinnagaannik tapersersuisinnaasunik isumassuisinnaasunillu amigaateqartarput.

Taamali ittunik neqerooruteqanngitsoq, Martha Lund Olsen oqarpoq:

- Meeqqanik inissiiniarneq ajornakusoortorujorujussuuvoq. Isumaginninnermi siunnersortit aperigajupput: Qanoq iliussaagut? Ajornartorsiummik qaangeruminaatsitsingaatsiarpugut, taanna oqarpoq.

Tamatuma saniatigut ulloq unnuarlu inissiifiit, meeqqanut inissaqartitsisut inuusuttut ajornartorsiutaannik isumaginninnissamut sakkussaqanngikkajupput.

Inissiisarfinni sulisut ilinniarsimasut amerlanertigut amigartarput. Perorsaanermillu ilinniarsimasortaat inuusuttunik sumiginnangaangaatsiarsimasunik, immikkut ilungersuuteqartunik isumaginnissinnaanissaminnut pikkorissarnikuusimaneq ajorput:

- Naak perorsaasutut ilinniarsimagaluarlutik tamanna meeqqanik isumassuinikkut sumiginnarneqarsimasunut atatillugu isumaginninnermi perorsaanermik ilisimasaqarnerannik isumaqanngilaq. Ilinniaqqinneq pikkorissarnerlu amigaataangaatsiarput. Tamanna pisariaqartinneqangangaatsiarpoq, Martha Lund Olsen oqarpoq.

Isumaginninnermi siunnersortit inuusuttunik inissiiniarnerminni – meeqqanut inissiisarfinnut isumaginnissinnaanerannik ilisimasaqarfiginngisaminnut – imaluunniit meeqqat ajornartorsiutaannik pilersitseqataasuni avatangiiseqartiinnassanerlugit aalajangiiniaraangamik ilungersunangaatsiartarpoq.

Politikkikkut pingaarnersiuisoqarnissaa amigaataasoq

Maannakkutut isikkoqartillugu kommunit nunatsinni meeqqanut inissinneqarsimasunut pissutsinik pitsaasunik qulakkeerinissamut sakkussaqanngillat:

- Inissiisarfinni inissat pisariaqartinneqangaatsiarput. Kommunit ataasiakkaarlutik tamanna namminneq kivissinnaanngilaat. Nunarput tamakkerlugu suliniutigineqartariaqarpoq. Kommunini ataatsimoortoqassanersoq imaluunniiit Namminersorlutik Oqartussaniissanersoq qinikkat misissussavaat, taanna oqarpoq.

Pingaarnertullu qinikkat inissiisarfinnik ajornartorsiutaangaatsiartumullu – naak oqallittoqangaatsiartaluartoq suli ajornartorsiutaasumut qanoq aaqqiiisoqarnissaanut pingaarnersiuinissaat pisariaqarpoq:

- Siunissaq ungasinnerusoq eqqarsaatigalugu pilersaarusiortoqartariaqarlunilu pikkorissartitsinerit aamma ulloq unnuarlu inissiisarfinnik nutaanik sanaartornerit sammineqartariaqarput, NIISIP-ip siulittaasua isumaqarpoq.