Inatsisitigut ataataqanngitsut pillugit suliaq naammassivoq

Suliarlu naammassisimasoq nalunaarutigaat. Tamanna pillugu Naalakkersuisut siulittaasuata Aleqa Hammondip isumaqatiginngilaa iliuuseqarfiginiarlugulu.

Kalaallit inatsisitigut ataataqanngitsut kingornussisinnaanissaanut suliniutit pillugit, Kalaallit Nunaat Danmarkilu isumaqatigiinngissuteqarsimapput. Suliat naammassinikut ammaqqinneqarnissaanut piumasaqaat Danmarkip akueriumanngilaa. Ataataasoq toqoreeraluarpalluunniit qitornaasoq kingornussisinnaanissaa anguniarneqaraluarpoq.

Danmarkimi ministeriuneq, Helle Thoning Smith, Aleqa Hammondimut allagaqarsimavoq suliaq unitsinneqartoq, oqaluuserineqaqqissanngitsorlu.

- Ministeriunerup allagaqarnermini aprilip qulaaluaani uannut oqaatigaa suliaq oqaluuseralugu naammassineqartoq, aammalu inatsisitigut ataataqanngitsut. aningaasatigut taarsiiffigineqarsinnaanissaminnut suliaq danmarkiminngaanniit Naalakkersuisunit oqaluuserineqarnianngitsoq. Oqarsinnaanngitsutut  marlunnik tunngaveqartunik. Siullermik, folketinngimut suliaq naammasseqqajanngilaq aamma folketingimut tunuliaqutaasut suliaq suli akuerinngilaat. Aappaattullu Statsministerilu oqaloqatigiissutigisussaallugu isumaqatigiissutigisimasarput atuutsittariapaa, Naalakkersuisut suliuttaasuat Aleqa Hammond ullaaq tusagassiortunik katersortitsigami oqarpoq.

Inuit pisinnaatitaaffiinut siunnersuisoqatigiit februarip aallaqqaataata missaani nalilerpaat ataataasoq toqukkut qimagutereersimappat naalagaaffik pisussaanngitsoq inatsisitigut ataataqanngitsunut taarsiinissaminut.

Taamaakkaluartoq suliat ataasiakkaat eqqartuusivikkut suliassanngortinneqarsinnaasut, tassanilu suliaq eqqortumik naammassineqarsinnaasoq.

Aleqa Hammondip nassuerutigaa naalagaaffik pisussaaffeqanngitsoq taarsiinissaminut. Inuillu ataasiakkaat qanoq inissisimanerat nalilersorneqaqqaartartussaasoq.

- Taakkununnga ataatsiakkaarlugu aningaasatigut taarsiissuteqarnissaq assigiinngitsunik soorunami sunniuteqassaaq, tassunga killittoqassappat. Kisiannili taakkununnga inuttut ataatsimoorlutik assigeequtaat uaniippoq aningaasatigut taarsiissuteqarneq minnerpaamik inuiaqatigiinnut intasisitigut akuerineqartutut  inissisimanertut nalilerneqassammat, Aleqa Hammond oqarpoq.

Inatsisitigut ataataqanngitsunut taarsiinissamut aningaasat qanoq amerlatigissagaluarnersut Naalakkersuisup siulittaasuata oqaatigisinnaanngilaa. Kisiannili piumasaqaatigerusullugu Kalaallit Nunaat sinnerlugu inatsisitigut ataataqanngitsut taarsiiffigineqarnissaat politikkikkut suliarineqassasoq. Tamannali qallunaat naalakkersuisuisa itigartitsissutigaat.

Naalakkersuisut siulittaasuata Aleqa Hammondip ministeriuneq Kalaallit Nunaata Københavnimi Sinniisoqarfiani ataatsimeeqatiginiarlugu pilersaaruteqarpoq. Ataatsimeeqatigiinneq apriilip 25-anni pissasoq neriuutigaa, tassa Naalagaaffeqatigiinneq pillugu Folketingimi oqallittoqarnissaanut ullut sisamat sioqqullugit.