Inatsisileritooq: Juullilernerani akissarsisitsisarneq atorunnaarsinneqarsinnaavoq

Akissarsiat juullip kingorna tunniunneqarnissaat pillugu Namminersorlutik Oqartussat apriilimi aalajangernerat aalajangiusimaneqassappat kattuffiit  aaqqiagiinnginnermi isumaqatigiissitsiniartarfimmut suliassanngortsitsinerat atuutiinnassaaq. Kattuffiit pineqartut tassaapput SIK, Atorfillit Kattuffiat, IMAK, PIP aamma PPK.

Sulisartut kattuffii  ataatsimoorlutik Danmarkimi inatsisilerituumik isumaqatigiissutini ileqqut pillugit immikkut ilisimasalimmik suliakkiipput.

Juullilernerani aningaasarsitsisarneq pituttorsimasumik isumaqatigiissuteqarnertut kattuffinnit tamanit isigineqalernikuusoq, Erik Hammekenimit Atorfillit Kattuffianneersumit oqaatigineqarpoq.

SIK-p siulittaasuata Jess G. Berthelsenip isumaqatigiissitsiniartarfimmut suliassanngortitsineq pillugu oqaaseqarnianngilaq, suliaq Erik Hammekenip tigummimmagu.

- Juulli sioqqullugu akissarsisitsisarneq ileqqut malillugit isumaqagiissutaavoq, isumaqatigiissut piffissaq sioqqullugu nalunaaruteqarnikkut atorunnaarsinneqarsinnaavoq, tamannalu pivoq apriilip qaammataani, sulisitsitsisut peqatigiiffianni inatsisileritooq Karsten Klausen oqarpoq.

Taamaattorli kommuunini sulisut juulli sioqqullugu akissarsitinneqarnissaat SIK-mit iluarisimaarneqarpoq.  SIK malillugu akissarsiaqartut 3.800-t missannik amerlassusillit juulli sioqqullugu akissarsissapput.

- Kommuunit tamatut aalajangersimanerat SIK-mit iluarisimaarparput, kommunit akissussaaffeqarlutik taamatut iliorput, Jess G. Berthelsen oqarpoq.

SIK malillugu akissarsiallit Namminersorlutik Oqartussani sulisut 1900-t missaannik amerlassuseqartut juullip kingorna aatsaat akissarsissapput.