Imarsiortunut qaammataasaq aallartilluarpoq
Danmarkip Imarsiornermut aqutsisoqarfiata - tassa Søfartsstyrelsip - issittup imartaani isumannaallisaanerulernissaq siunertaralugu qaammataasiaq atulersinneqarpoq, qaammataasamiillu paasissutissat pissarsiarineqartut siulliit ilimagisamiit pitsaaneroqaat.
- Qaammataasiap atuleqqaarnerminit minutsit 80-it qaangiutiinnartut umiarsuit 1000-t sinnerlugit nalunaarsoriikatappai, tassa qaammataasaq ilimagisatsinnit pitsaaneroqaaq, Jens Dalsgaard Nielsen, Aalborgip Universitetiani ilinniartitsisuusoq oqarpoq.
Qaammataasap AAUSAT-ip umiarsuit sumiinnerminik, sukkassusaannillu paasissutissat AIS-inik taagorneqartartut tamaasa tigoorarsinnaavai. AIS-mit paasissutissat sineriammut 60 kilometerimik ungasissuseqalernermi aatsaat tigoorarneqarsinnaasartut qaammataasap nutaa imaannarsuarmiinneranni tigoorarsinnaalerpai.
Qaammataasaq immuup puuatut angitigiinnarpoq. 1 kilomik oqimaassuseqarpoq antennellu 30 centimeteriinnaallutik.
Suliniummi pisussaq tulleq tassaavoq uuttortaavimmik nutaamik Qaanaap eqqaani Søfartsstyrelsep ikkussinissaa.
- Tamanna qilanaareqaarput, Qaanaarmi ima avannarpasitsigisumiippoq qaammataasap maligaasaanik tigooqqaavissaqqinnerululni. Tassa taavani tigooraaviliortoqarpat qaammataasap umiarsuarnut tappinnerulernissaa qularisassaanngilaq, sapaatillu akunnialunnguit qaangiutsinnagit Qaanaap eqqannguani tigooraaviliortoqarnissaa neriuutigaarput, Jens Dalsgaar oqarpoq.
AAUSAT3 misileraatigut ingerlavoq tassanilu paasisat ilisimatusartut suleriaqqinnissaanni atorneqassapput. Kissaatigineqartut ilagaat SAR-imi upalungaarsimaniarnermi atorsinnaasumik qaammataasamik peqalernissaq.
- Annanniummi Nuup avatinnguaniittoq avataarsuaniit takuneqarsinnaava? Ila tamanna iluatsissinnaappat upalungaarsimanermut iluaqutaassagaluaqaaq, Jens Dalsgaard Nielsen, Aalborgip Universitetiani Lektoriusoq taama oqarpoq.
Aalborgip Universitetiani ingeniørinngorniat qaammataasaq ukiut tallimat atorlugit sanavaat. Qaammataasallu sananeqarnera ilinniagassanut iluatsiinnarlugu taputartuunneqarsinnaasimariarmat 1,3 millionit koruuniinnaat atorlugit qaammataasaq suliarineqarsimavoq.
