Illoqqortoormiuni assinik qangaaneersunik saqqummersitsilersut
Arnold Heimip Uummannaq pigissani assilisaanik assaannarmik qalipaasersukkanik saqqummersitsineq Tasiilap katersugaasiviani ukiaq saqqummersinneqareerluni Illoqqortoormiuni saqqummersinneqartussanngorpoq.
Alfred de Quervainsip Eqimit Ammassalimmut sermersuaq itivillugu angalanerata ukiunik 100-nngortorsiorneranut atatillugu saqqummersitsineq pilersinneqarsimavoq.
Illoqqortoormiuni katersugaasiviup aaqqissusaanik katersortarfimmi saqqummersitsisoqassaaq.
Aammattaaq Erik Tormip atuakkiaa Grønland for 100 år siden saqqummersitsinermut atatillugu pisariarineqarsinnaassaaq.
Atuakkap tunisaaneranit isertitat Uummannami meeqqat angerlarsimaffiannut tunniunneqassasut, Erik Tormip oqaatigaa.
Schweizimiut pingasut piffissami 1909-mit 1912-imut nunatsinnut paasisassarsiornerannut atatillugu assilisanut tunuliaqutaasut Erik Tormip saqqummersitsinermi oqaluttuarissavai.
Saqqummersitsineq apriilip 21-iata tungaanut Illoqqortoormiuniissaaq, kingornalu Sisimiut Katersugaasivianut maajip qaammataani ingerlateqqinneqassalluni, septembarimilu Maniitsup Katersugaasiviani aamma saqqummersinneqassalluni.
Atuagaq Uummannaq Polar Institutesip nittartagaani pisiarineqarsinnaavoq. Ingerlaqqiffissaq ataaniittoq tooruk.
