Ilisimatooq: Innuttaasut paasiniaasinnaanissaat killeqarpoq
Innuttaasulli suliniutinut angisuunut isummersornissaminnut piareersimanngillat, tassami suliniutinut tunngasunik itisiliillutik misissuisartut tassaagajummata, suliffeqarfiit piiaasussat aamma aatsitassanut qullersaqarfik.
Taamaattumik Ilisimatusarfimmi inuiaqatigiinnik ilisimasallip Birger Poppelip februaarimi qineqqusaarnermi siunnersuutaa taperserneqarluarpoq.
- Aatsitassarsiorniarlutik suliniuteqartut, innuttaasut kattuffiillu atugassaannik aningaasanik illuartitsisalernissaat, siunnersuutigaara. Tassalu innuttaasut kattuffiillu aningaasat taakkua atorlugit immikkut ilisimasalinnik sulisitsisinnaassapput, piginneqatigiiffissuit nalunaarusiaannik atuaqqissaarsinnaasunik, taassumalu saniatigut suliniutip kingunerisinnaaasaannik namminnnerlutik misissuisinnaasunik. Birger Poppel radioaviisimut februaarip 25-anni taama oqarpoq.
Taamani qineqqusaarnermi Poppelimut tapersiisut tassaapput, Atassut, Siumut, IA aamma Demokraatit.
Rubinimik piiaanissamut suliniutip tusarniaassutigineqarnerata qiteqqunnerani, avatangiisinik illersuiniaqatigiiffiup Avattap siulittaasuata Mikkel Myrupip partiit qinersisartunut februaarimi neriorsuutigisaannik eqqaasippai.
- Suliniutit suliffeqarfissallu pitsaaqutaat kisiisa tusartarpavut, ajoquterpassuilu suli tusarnatigik, Mikkel Myrup oqarpoq. Aatsitassarsiornissanut pilersaarutinik itisiliillutik misissuinissanut millionilikkaanik aningaasaatillit tassaapput nunani tamalaani suliffeqarfissuit aatsitassanullu qullersaqarfiit - innuttaasut peqatigiiffiillu akissaqanngimmata.
Ilisimasat maanna pigineqartut, ilaminiinnanngui tamanit pissarsiarineqarsinnaasut, suliniutinik aallartitsinissamik suliniaqatigiinneersuupput.
Peqatigiiffiit innuttaasullu isornartorsiuiniartut, immikkut ilisimasalinnit ikiorserneqarnissamut periarfissaqanngillat. Tamanna aatsitassarsiortitseqatigiiffissuit peqatigiiffiillu isornartorsiuisartut assigiinngitsorujussuarnik peqqinnanngitsumillu nukissaqarfigisarpaat. Peqatigiiffiillu naammagittaalliuinnartutut ajortisaariniaannartutullu isiginiarneqartarlutik, Mikkel Myrup oqarpoq.
- Tassa aningaasanik immikkoortitsisoqartassasoq, taamaalilluni suliffissualissanut tamakkununnga assigiinngitsunut, taakkualu tamarmik immikkut avatangiisinut qanoq sunniuteqarsinnaanerannut tunngasunik pitsaasunik allaaserinnittoqarsinnaaniassammat, Avattap siulittaasua, Mikkel Myrup, oqarpoq.
Avatangiisinik illersuiniaqatigiiffiup isornartorsiuineranut tunngatillugu, Aatsitassanut Naalakkersuisoq Jens-Erik Kirkegaard Radioaviisip maanna ulluni pingasunngortuni pissarsiariniaraluaramiuk iluatsissinnaasimanngilaa.
