Igutsappassuit nunatsinni igutsaap tungusunnittoqartitsiniartut
Kujataamiut igutsaateqarneq ukiut tallimat qulillu akornanni misiligareerpaat. Grønlands Biavlerforeningili, siorna pilersinneqartoq, maanna aallartisarnialiartoq, peqatigiiffiup siulittaasua Ole Guldager oqarpoq:
- Taakkkua igutsaap tungusunnitsuanik pilersuissapput. Igutsap tungusunnitsuanik ukialunni anginngikkaluamik tunisassiortareerpugut. Maannali pimoorussinerulerusuppugut annerusumillu tuniusassiulerluta, Ole Guldager oqarpoq.
Igutsannik Kujataani marloriarluni inissiisoqartareerpoq. Siullermik ukiut aqqaneq marluk matuma siorna, taakkuali ikiliartuinnarlutik maanna nungungajassimapput.
Ole Guldagerip ilimagaa, igutsaat ningiorsuaarussimanerannik tamanna peqquteqartoq. Assersuutigalugu Danmarkimi nunanilu allani igutsaqatigiit ningiorsuaarukkaangata, ningiorsualiortunut sianeraanni, igutsaatilik nutaamik aqagukkut pissarsereertarput. Nunatsinnili igutsaatillit namminneq tamakkua isumagisussaammatigit, taamaaliorneq ajornartoq, Ole Guldager oqarpoq.
- Igutsaat naammattumik amerlassuseqalissappata, naammattunik igutsaat ningiorsuaateqalertariarpugut. Tassalu taamaaligutta igutsaat Narsarsuarmi Arsummilu sumiiffinnut amerlanerusunut inissinneqarsinaassapput, Ole Guldager oqarpoq.
Tassalu taamaammat igutsaat millioonit affat Narsarsuarmut tikisinneqarsimapput. Taakkua ilaqutariit quliupput, Ole Guldagerilu neriuppoq ukiamut ilaqutariit 20-nngussasut.
Igutsaat tikisitat Sverigip avannaaaneersut, nunat avannarliit igutsaat kajortut, ukiut tallimat matuma siorna tikisitanit allaanerupput.
- Taakkua uatsinnut pitsaasuupput, issittumut naleqqussaagaagamik, igutsaatilik oqarpoq.
Tassalu isumaqarpoq, ajutoorpiarsinnaanatik. Igutsaammi nappaateqanngillat Naamineerlutillu siaruiarsinnaanatik, igutsaat inaannik sanassagunik, orpiit putuini inissaqarnissartik pisariaqatikkamikku.
Ole Guldager neriuppoq Nunatsinni inuit amerlanerusut igutsaateqarnermik soqutiginnilissasut. Isumaqarpormi Qeqertarsuup Tunua tikillugu kitaani tamani igutsaateqartoqarsinaasoq.
