Gazami iliverpassuarnik nassaartoqarneranik nassuiaateqarnissaq USA-mi præsidentip illorsuata piumasarigaa

Gazami napparsimmaviit marluk nalaanni iliverpassuarnik nassaartoqarnera pillugu Israelimi oqartussat nassuiaateqarnissaat USA-mi præsidentip illorsuata piumasaraa.

Nutaarsiassaqartitsivik AFP taama allaaserisaqarpoq.

Inuit toqungasut 340-ngajaat nassaarisimallugit, Gazami illersornissamik suliallit sapaatit akunnerata massuma ingelanerani ilisimatitsissutigaat.

Inuit Israelimiut sakkutuuinit illoqarfiup Khan Younisip ilaani Nasserip napparsimmaviata nalaani toqutaasimanerarneqarput.

Israelip illersornissaqarfiata pasilliutit taakku marlunngornermi ilumuunnginnerarpai.

Inuit toqungasut timaat 30-t Gazami Al-Shifap napparsimmaviata eqqaani sumiiffinni marlunni ilineqarsimasut nalunaarutigineqarpoq.

- Akissuteqartoqarnissaa kissaatigaarput, USA-p naalagaaffiata isumannaallisaanermut tunngasuni siunnersortaa Jake Sullivan oqarpoq.

- Peqqissaarutaasumik sukumiisumillu misissuisoqarnissaa piumasaraarput, taanna nangilluni oqarpoq.

Iliverpassuarnik nassaartoqarnerata arlaannaannulluunniit attuumassuteqanngitsunit misissorneqarnissaa Naalagaaffiit Peqatigiit piumasaraat.

Inuit toqungasut timaat misissorneqarsimasut Israelimi illersornissaqarfiup oqaatigaa, Hamasip sallunaveeqqutitut siorna oktobarip ulluisa arfineq-aappaanniilli tigummiai inuit ilineqarsimasut akornanniinnersut misissorneqarluni.

- Israelip sakkutuuisa Palæstiinamiunik ilisisimanerannik oqarnerit ilumuunngillat, Israelip illersornissaqarfia marlunngornermi oqarpoq.

Toqungasut timaat misissorneqareermata ileqqinneqartut, illersornissaqarfiup tassunga atatillugu aamma oqaatigaa.

Al-Shifap napparsimmavia nunat tamalaat inatsisaat naapertorlugu illersugaavoq, arlaleriarlunili eqqorneqarsimalluni.