Brasiliami qarsutsinersuaqarnerani inuit 56-it ajunaartut

Brasiliap kujasissortaani qarsutsinersuaqarnerani nunallu sisoornerani ajunaartut 56-iupput.

Brasiliami oqartussat taama ilisimatitsipput.

Ajunaarsimasullu amerlanerunissaat aamma ernummatigineqarpoq.

Annaassiniartartut inuit maqaasineqartut umiatsiat timmisartullu atorlugit ujaarivaat, illullu, ikaartarfiillu aqquserngillu taassuma saniatigut ajalusoorsimapput.

Brasiliap kujasissuani nunap immikkoortuani Rio Grande do Sulimi qarsutsinersuaqarnera ima sakkortutigaaq allaat sapusiat ajalasoorsinnaallutik, nunap immikkoortuani tassani illoqarfiit pingaarnersaanni Porto Alegremi aatsaat taama qarsutsinersuaqarfiutigisinnaalluni. Oqartussat taama mianersoqqussuteqarput.

Porto Alegremi aatsaat taama sakkortutigisumik qarsutsineqarnissaa ilimagisariaqartoq, Rio Grande do Sulip guvernøriata Eduardo Leitep oqaatigaa.

Porto Alegremi, 1,5 millionit missaannik innuttaqartumi aqquserngit qarsutsiffiupput.

Nunap immikkoortuata upalungaarsimasuisa oqarnerat naapertorlugu tamaani kommunit 265-it silapilunneranit ataasinngormalli eqqorneqarput.

Porto Alegremi aatsaat taama qarsutsinersuaqarfiutigaaq

Ajunaartut saniatigut inuit 74-it aqqunartitersimapput, allallu 24.000-nitikinnerunngitsut najukkatik qimaannartariaqarsimavaat, sumiiffinnilu allani unnuiffissarsiortariaqarsimallutik.

Inuit ikinnerpaamik 68-it maqaasineqartutut nalunaarutigineqarsimapput.

Ajunaartut 29-unerat sisamanngormat oqaatigineqarpoq, amerlanerusulli kingorna paasinarsilluni..

Porto Alegremi 1941-mili aatsaat taama qarsutsinersuaqartigaaq.

Rio Grande do Sulimi sumiiffinni allani illoqarfinni innuttaasut ingerlariaqqissinnaajunnaaqqapput, avammullu attaveqaatit aamma kipisoorsimallutik.

Inuit tuusintilikkuutaat najugaat innaallagiaarussimapput, nunallu immikkoortuani tassani atuarfiit aamma matoqqatinneqarlutik.

Brasiliap præsidentia Luiz Inácio Lula da Silva, Rio Grande do Sulimi qarsutsinersuaqarfiusut sisamanngornermi tikeraarpai.

Taassuma oqarnera naapertorlugu silap pissusiata allanngoriartornera qarsutsinersuaqarneranut pissutaavoq.