Folketingimi unnuk kulturisiorfimmi IA urani pillugu oqallitsitsiniarpoq nipilersortunillu aliikkusersuisitsilluni

Tupaallannanngitsumillu Københavnimi tallimanngorpat unnummi kulturisiorfimmi urani pillugu IA oqallitsitsiniarpoq, IA-miillu qaaqqusisuuvoq Johan Lund Olsen, Sara Olsvigip Inatsisartut ukiakkut ataatsimiinnerannut peqataanerata nalaani taartaasoq.

IA-p urani pillugu oqallititsitsinera Verdensnaturfondimit, avatangiisinik illersuiniaqatigiiffimmit NOAH-mit allanillu peqataaffigineqassaq.

-Arnaq inuusuttunnguaq nersoraasigaasimasoq Malu Rohmann erinarsortissallugu iluatsissimavarput. Taanna ukjiormanna ”Emerging Female Artist, Greenland Award”-imik nersornaaserneqarpoq, taamaammat unnuup nuannersumik ingerlanissaa qilanaarivara. Kikkullu tamarmik peqataanissaannut soorunami tikilluaqquavugut, Johan Lund Olsen oqarpoq.

Københavnimi unnuk kulturisiorfik peqataaffigineqarluartarpoq, sullissiveqarfiillu ornigarluarneqarnerpaat tassaasarput DR Folketingilu. Folketingi, Danmarkimi pissaanerup katersorneqarfigisaa, ullormi tassani kikkunnit tamanit iserfigineqarsinnaasarpoq,  ukiunilu kingullerni 10.000-it 17.000-illu akornanni pulaarneqartarpoq.

Folketingimi unnuk kulturisiorfik pillugu uani allanik atuagassaqarpoq: http://www.ft.dk/Aktuelt/temakulturnat.aspx