Danmarkimi ilinnialersut amerliartortuarsinnarput

Københavnimi  Aalborgimilu ilinnialersut ingammik amerliallapput. Storebæltip kangiani kalaallit 238it ilinniaqqinnissaminnut, ilinniarniarlutik piareersarnissaminnut imaluunniit atuagarsornikkut inuussutissarsiummilluunniit ilinniakkaminnut tapiissutissatut ilinnialerusullutik qinnuteqarput. Ukiuni marlunni kingullerni tamakkua ikiliartoraluariarlutik, maannakkut qinnuteqartut 2011imut sanilliullugit 50inik amerliallapput.
 
Region Sjællandimi Region Hovedstadenimiluunniit ilinnialernissaminnut akuerisaasut kalaallit, aatsaat taama amerlatigalutik, 132iupput. 

Aalborg ornerusunneqarpoq
Aalborg aamma kalaallinit ilinniarfiginiarneqarluarpoq, aasaq manna qinnuteqartut 97it akornanni 54it tassani tiguneqarput. Minnerunngitsumik ilinniarsinnaasat nutaat pilerigineqarput, Aalborgimi Kalaallit Illuutaanni ilinniartunut siunnersorti, Signe Vinter Bach, oqaluttuarpoq.  

- Ukiuni kingullerni Jyllandip avannarpasinnerusortaani nakorsaatilerineq inatsisilerinerlu ilinniarusunneqarnerusut takusinnaavarput. Ukioq manna assersuutigalugu ernisussiortunngorusullutik qinnuteqartut tallimaapput. Taakkualu amerlaqaat.
 
Jyllandip avannarpasinnerusortaata ilinniartunit ornigarneqarusunnera, Aalborgip ilinniarfissatsialattut nittarsaannerata kinguneraa.
 
- Ilinniarfissatsialanngorniarluni Aalborg sorpassuarnik iliuuseqarnikuuvoq. Ilinniartut pisariaqartitaat pilersiortorneqarnikuupput, kollegianilu inissat amerlaqisut sanaartorneqarnikuullutik, kiisalu kulturikkut misigisinnaasat ilinniartuunermilu nuannaarsaataasinnaasut eqqumaffigineqarlutik.
 
Jyllandip avannarpasinnerusortaani kalaallit amerlanerusut ilinnialersinniarlugit iliuuseqarnermut, Aalborgimi Kalaallit Illuutaat peqataanikuuvoq.
 
Kalaallit Nunani allani ilinnialersartut ikileriarput
Taamaakkaluartoq Kalaallit Nunaata Danmarkillu avataanni kalaallit ilinnialerniartut suli ikittuinnaapput.
 
Ukioq manna Københavnimi Kalaallit Illuutaat aqqutigalugu nunani allani ilinnialernissaminnut qinnuteqartut arfine pingasuinnaapput. Taakkualu aatsaat taama ikitsigisut, Københavnimi ilinniartut siunnersortaat Pia Rosin Heilmann oqaluttuarpoq.
 
- Kalaallit ilinniarluarsimasut Nunatsinnut uternissaat kissaatiginaraluarmat, siunissaq eqqarsaatigalugu tamanna isumakulunnarpoq.
 
Nunani allani ilinniarniartut ikilinerannut ilaatigut pissutaavoq, ilinniarlerniartut namminneq piareersaqqaarnissaannik tamakkua piumasaqaateqarnerat, Pia Rosing Heilmann nassuiaavoq.
Tamakkua saniatigut, nunani allani ilinniarnissamut pisortanit akiliutsissagaanni, ilinniagassap Danmarkimi Nunatsinniluunniit ingerlanneqarsinnaannginnera piumasaqaataavoq.  
 
Kalaallit ilinnialerusuttut aamma kalaallit qallunnaallu oqaaserinngisaat atorlugit ilinniarnissartik merserisaraat, Københavnimi Kalaallit Illuutaannit maluginiarneqarpoq.