Canadap qipoqqaq uumasut nungutaanngujoortut allattorsimaffianiikkunnaarsippaa
Canadami naalakkersuisut qipoqqaq uumasut nungutaanngujoortut allattorsimaffiannut 2005-imili ilannguppaat. Uumassusilinnilli misissuisoqarfiup arlaannaanulluunniit attuumassuteqanngitsup 2011-mi kaammattuutigaa qipoqqaat ima amerlatigilersimammata, nungutaanngujoortutut inissinneqarsimanera pisariaaruttoq allattorsimaffimmiikkunnaarsinneqassasorlu.
Canadami avatangiisinut ministeri Leona Aglukkaq, aamma Issittumi Siunnersuisooqatigiinnut siulittaasuusoq, Canadami aalisarnermut ministeri Gail Shea peqatigalugu nungutaanngujoortut allattorsimaffianniikkunnaarsinneqarnissaanik aalajangiisuuvoq.
British Columbiami Ilisimatusarfiup Manerassuarmi imarmiunik miluumasunik misissuisoqarfiani ilisimatuut pisortaat, Andrew Trites, naapertorlugu, B.C.-mi qipoqqaat siumorneqartartut aatsaat taama amerlatigipput. Qipoqqaat 2.200-t missaat tamaani aasarsiortarput qipoqqaallu amerlassutsimikkut 4 procentinik qaffakkiartorlutik, tamannalu sukkasuupilussuusoq CBC-mut oqaatigaa.
Isornartorsiusulli Canadami naalakkersuisut pisuutippaat British Columbiamit Kangianut umiarsuarnik assartuussisalernissaq siunertarinerarlugu. Canadamimi naalakkersuisut The Northern Gateway Pipe, uuliap aqqutissaa, umiarsuarnut uuliamik assartuutinut ingerlaartitsisussaq siunissami aalajangiiffigisussaavaat.
Umiarsuit arfernik aporsisinnaanerat, uuliamik mingutsisisoqarsinnaanera umiarsuillu nipiliornerisa arfernik qimaatitsisinnaanerat avatangiisinik illersuiniaqatigiiffiup Living Oceans Societyp aarleqqutigaa. Arferit nungutaanngujoortutut nalunaarsorneqarsimatinnagit, Canadap naalakkersuisuisa immikkut eqqissisimatitsiveqartinnissaannut pisussaaffeqanngillat.
