Canadami Ilumoortoq Saammaasseqatigiinnissarlu anguniarlugit isumalioqatigiissitaq ataqqinaammik uppernarsaasussamik toqqaavoq

Taamatulli suliaqarnermi paasisat naqisimaneqarnermut atornerluinermullu tunngasut, "immikkut ilisimannittutut" toqqakkat aqqutigalugit ingerlateqqinneqassapput, taakkumi paasisat eqqaamaneqartuarnissaat qulakkeerniartussaassavaat.

Mary Simon, naggueqatigiit siuttuat ilisimaneqarluartoq, Ilumoortoq saammaasseqatigiinnissarlu anguniarlugit Isumalioqatigiissitap qaammammi kingullerni ataatsimeersuartitsinerani "immikkut ilisimasalittut" - tassa honorary witness-itut - toqqarneqarpoq.

Immikkut ilisimannittutut toqqagaasut, Canadami nunap inoqqaavi sinnerlugit, pisup oqaluttuarisaanermut tunngasup siunissami kinguaariinnit eqqaamaneqartuarnissaa suliassaraat, pingaarnerpaatullu ilisimannittut nassuiaatigisaat inuiaqatigiinni inuuffigisaminni ilisimaneqalersittussaallugit.

Isumalioqatigiissitap atuarfiit nerisaqarfiutigisut, tamakkunanilu atornerluinerit pisarsimasut immikkut sammisariaqarsimammagit aamma oqaluttuarisaanerup ilaa tamanna Canadamiunit ikittuinnarnit ilisimaneqarmat, Mary Simonip isumalioqatigiissitamut ilisimannittutut nassuiaatigisamini ilinniagaqarnerup pingaaruteqassusia erseqqissarpaa.

Taassuma immikkut ilisimasalittut toqqagaanerminut atatillugu persuarsiortoqarnerani, allagaq uppernarsaat naggueqatigiit Inuit ilinniartitaanermut periuseriniagaannut tunngasoq tunniuppaa.

Mary Simonip Radioaviisimut oqaluttuaraa, allagaq uppernarsaat taanna, naggueqatigiinnut Inunnut tunngasoq, matusartumut qisummik sanaamut inissinneqassasoq, katersugaasivimmilu isumalioqatigiissitap sulineranut atatillugu pilersinneqartussami erlinnartuutitatut pigineqalissasoq.

- Paaseqatigiinneq saammaasseqatigiinnermut ilaavoq, taamaattumik Canadap oqaluttuarisaanerata ilaa tamanna Canadamiunit tamanit ilisimaneqalertariaqarpoq, Mary Simon oqarpoq, nangillunilu:

- Nunap inoqqaavisa kulturii Canadami atuarfinni tamani atuartitsinermi ilaatinneqalernissaat sulissutigisariaqarparput. Aatsaat taamaaliortoqarpat, paaseqatigiinneq saammaasseqatigiinnerlu immaqa angusinnaavagut, Mary Simon naggasiivoq.