Canadami arnarpassuit naggueqativut periarfeerunneqartarput
Nunap inuiisa arnartai periarfeerunneqartartut imaluunniit inuartarineqartartut pillugit nalunaarusiaq sivisuumik utaqqisaasimasoq sapaatip akunnerani uani kiisami saqqummerpoq. Nalunaarusiaq ukiuni arlalinni suliarineqarsimavoq millionerpassuarnillu akeqarsimalluni.
Nalunaarusiaq taaguuserneqarsimavoq ”Forsaken”, kalaallisuunngorlugu ”Qimatat”, ataatsimiititaliarsuullu eqqartuussissuserisumit Wally Oppalimit siuttuuffigineqartup suliaata inerneralugu.
Arnat periarfeerunneqartut ilaqutaasa suliat politiinit iliuuseqarfigineqartannginneri pillugu kamannerannik aallaaveqarpoq. Ilaammi isumaqarmata, taakku nunap inuiisa arnartarimmatigit soqutaanngitsut.
Ajornartorsiut najugaqarfinni kippasinnerusuni anneruvoq, nunali tamakkerlugu eqillit Inuillu arnartaat periarfeerullutillu inuartarineqartarsimapput. Arnat pineqartut ukiuni kingullerni qulini 3.000-it 6.000-illu akornanniissangatinneqarput.
Politiit sukkasuumik iliuuseqartarsimannginnerat sulianillu pimoorussisarsimannginnerat nalunaarusiami uppernarsarneqarpoq peqatigisaanillu nunap inuiisa arnartaasa ilarpassuisa atugaannik takutitsilluni. Imerajuttuuneq, nakuusertarneq, imminut toquttarnerit, ilaqutariit avissaartuussimasut, ataatsimut oqaatigalugu ajortut kippiveqanngitsut.
Alianartorpassuit pinngitsoortinnissaannik suliaqartussanik nuna tamakkerlugu attaveqaqatigiinnik pilersitsisoqarnissaa nalunaarusiami ilaatigut kaammattuutigineqarpoq. Aammattaaq ilaqutariit meeqqallu ilaquttaminnik annaasaqarsimasut aningaasatigut taarsiivigineqassapput.