Cairn Nunatsinni unikkallarpoq
Cairn Energyp uuliasiornermi atortuni Nunatsinnit maanna aallarussorpai. Biilit usisaassuit uuliamut sullulissuarnik, qillerutit nooqutaannik uuliasiornermilu atortunik allanik Nuummi umiarsualivimmut ammukaassuipput, tamakkua Nunatsinnit aallarunneqassammata.
Taamaaliorneq Cairn Energyp maani pisortaata Kenny Smithip uppernarsarpaa. Atortulli aallarussorneqarnerannut suna peqqutaanersoq, taassuma maannakkuugallartoq oqaluttuarisinnaanngilaa.
- Qullersaqarfitsinnit piginnaatinneqaleruma oqaluttuarerusuttupilussuuara, Kenny Smith oqarpoq.
Imaanngilaq pitsaanngitsumut ingerlasoqartoq
Uuliasiortitseqatigiiffissuup Nuummi allaffini matoqqammerpaa, tassanilu sulisut soraarsillugit. Atortullu maanna aallarussorneqalerput, Nunaoilimi pisortaq Hans Kristian Olsen taamaakkaluartoq isumaqarpoq, imaattariaqanngitsoq, pitsaanngitsumut ingerlasoqartoq.
AAMMA ATUARUK Uuliasioqatigiiffissuup Nunatsinni allaffeqarfini matuaa
- Atortuminnik tuniniaanerminnut peqqutigigunarpaat aamma Qimusseriarsuarmi ukiuni aggersuni qillerilissagunik atortut nutaaliaanerpaat atorlugit qillerinissartik siunertarigamikku, Hans Kristian Olsen oqarpoq.
Taanna oqaluttuarpoq, maanna susoqanngivittoq, taavalu aasaq manna aappaaguluunniit qillerisoqassanngitsoq. Taamaannerali Nunatta imartaani uuliasiornissamut soqutigisaqannginnermut ersiutitut tiguneqassanngitsoq oqaatigaa, eqqaallugulu akuersissutinik suli tunniussisoqartartoq.
AAMMA ATUARUK Cairn Energy annertuumik ajornartorsiorpoq
Taamaammat qilanaarutissaqanngikkaluartoq, immaqa aamma illuanik ugguaatissaqanngilaq.
- Atortunik aallarussuineq Cairn Energyp sujumajunnaarneratut isigisariaqanngilaq, Hans Kristian Olsen oqarpoq.
Cairnip qullersaqarfiani tusagassiinermut pisortaq, Ellie Goss, KNR-imut oqarpoq, Cairn Energyp Qimusseriarsuarmi suliani ingerlatiinnassagaa, aasaq mannali susoqassanngimmat, atortut Kalaallit Nunaaniitiinnarnissaat pisariaqanngitsoq.
