Cairnip Statoil suleqatigilerpaa
5 milliarder koruunit sinnerlugit atorlugit Kalaallit Nunaanni misileraalluni kinguneqanngivissumik uuliasiorluni qillereerluni, uuliasiortitseqatigiiffinnik akuersissummik peqartunik suleqatissarsitinnatik uuliasioqqinniaratik Cairn Energyp decembarimi erseqqissaatigaa - suleqatissarsissagunimmi aningaasartuutiminnik avitseqatigiissinnaassagamik.
- Statoilip Issittumi misilittagaqarluarnera pissutigalugu Pitumi uuliasioqatigissallugu pileritsaapparput, Pitumimi uuliaqarluarnissaa ilippanaateqarluarpoq, Cairn Energymi pisortaaneq Simon Thompson oqarpoq.
Cairn Energy suliffeqarfittut atuutiinnassaaq - 57 procentingajak piginneqataaffigissallugu, Kalaallit Nunaanni uuliasortitseqatigiiffiup, Nuna Oilip, piginneqatigiissutini 12,5 procent aamma tigummiinnassallugu.
- Kalaallit Nunaanni oqartussat qanimut suleqatigalugit Baffinip kangerliumarngani misileraalluta qillerinissarput suleqatissavullu qilanaaraarput.
Akuersissutip nutaap Issittumi sulinissarput periarfissinnerussaqaa, nunarsuaq tamakkerlugu misissuisarnerni Statoilimi pisortaq, Nicholas Alan Maden oqarpoq.
Uuliasiorfissamik nutaamik qilleritinnatik - aamma sumi qillerissanerlutik - sajuppillatsitsisarluni misileraanernit paasissutissat suleqatigiilersussat misissuataaqqaassavaat. Misileraalluni qillerineq 2014-imi decembarip ulluisa 31-ata tungaanut pissaaq.
