- Ataasimiinneq ataatsimut isigalugu ajunngitsumik naammassisaqarfiusumillu ingerlasoq isumaqarpunga.

Inatsisartut ilaqutariinnermut peqqissutsimullu ataatsimiititaliaanni siulittaasup tullia, Bjørk Lange Olsen, Kommuneqarfik Sermersuup borgmesterianik, Avaaraq S. Olsenimik, ataatsimeeqateqarneq pillugu taama oqarpoq.

Ataatsimiinneq takornarialerisumut Nuuk Oudoorimut meeqqat angerlarsimaffiup avataanut inissinneqarsimasunik paarisaqartumut immikkullu ittumik inissiisarnermut tunngavoq.

- Oqaloqatigiilluarpugut. Borgmesteri meeqqanut avataanut inissinneqartartunut ernumassutigineqartunut tusaaniarpoq, Bjørk Lange Olsen oqarpoq.

Kommuneqarfik Sermersooq meeqqat angerlarsimaffiup avataanut pinasuartumik inissinneqartut, KNR-imit piffissami kingullermi allaaserineqaqattaartut pillugit aaqqiissuteqarniartoq, Bjørk Lange Olsen misigisimavoq.

Bjørk Lange Olsenilli oqarnera naapertorlugu, kommunip meeqqanik immikkut ittumik suli inissiisarnissaa ilimagineqartariaqartoq borgmesteri oqarpoq.  

- Taannartaa toqqissisimanarpallaanngilaq, Bjørk Lange Olsen oqarpoq.

Oqaloqatigiinnerunissaq

Tamannalu pitsaanngitsoq, taanna isumaqarpoq. Borgmesterimillu ataatsimeeqateqarneq eqqarsalersitsivoq.

- Kommunimeersut allamik iliuusissaqarneq ajoramik immikkut inissiisariaqartarlutik oqaatigisaqattaarpaat. Taamaammat tamanna unitsinniarlugu qanoq iliorsinnaanerluta ataatsimoorluta paasiniartariaqarparput.  

-  Ataatsimiitsitaliamit arlaannik iliuuseqarnissatsinnut piareersimavugut. Massami uanga nammineerlunga piareersivunga, Bjørk Lange Olsen oqarpoq.

Taassuma oqarnera naapertorlugu, ataatsimiititaliap borgmesterillu oqaloqatigiinnerusarnissaq isumaqatigiissutigaat. Meeqqat angerlarsimaffiup avataanut inissinneqartartut pillugit ajornartorsiutit ataatsimoorlutik aaqqiiviginiarsariniarpaat.

- Taamanna ajunngitsorujussuuvoq. Qilanaarpunga. Suliaqarfimmi pitsanngorsaanissarput iluatsissagutsigu ataatsimoorfissarsiortariaqassagunarpugut. 

Borgmesterip meeqqat Nuuk Outdoorimiittut maanna arfineq marluusut sisamanngornermi ataatsimiinnermi paasissutissiissutigaa. Taakkunannga marluk inissiffissarsineqarsimapput, pingasullu utaqqisuniillutik. Sinneruttut marluk 18-ileereersimapput. Kommuni 18-ileereersimasunut naleqquttumik aaqqiissutissarsiorpoq.   

- Ajunnginneruleriartorpoq, Bjørk Lange Olsen oqarpoq.

Borgmesteri Avaaraq Olsen KNR-imit apersorneqarnissaminut sisamanngormat ataatsimiinnerup kingorna periarfissaqanngitsoq, Kommuneqarfik Sermersuup attaveqaqatigiinnermut immikkoortortaqarfiata paasissutissiissutigaa.