- Tamanna naggaterpiaani borgmesterip akisussaaffigigaa erseqqissassallugu pingaaruteqarpoq.

Inatsisartut ilaqutariinnut peqqinnissamullu ataatsimiititaliaani siulittaasup tullia, Bjørk Lange Olsen (D) oqarpoq.

KNR-ip ilanngutassiaanit arlalinnik Kommuneqarfik Sermersuup meeqqanik angerlarsimaffiup avataanut inissinneqarsimasunik isumaginninneranik saqqummiussinerata kinguneratigut taanna taama oqaaseqarpoq. Kommunip meeqqat takornarialerisut suliffeqarfiannut, Nuuk Outdoorimut, meeqqanik nunaqarfimmut Kapisilinnukaassisunut 2023-mi maajimili inississimavai.

Meeqqat katillugit 17-it illuaqqani nillertuni, mikisuni immikkut isumaginninnissamut ilinniarsimanngitsunik paarsisoqartinneqarpoq. Tamanna tillinniarnermik, aserorterinermik arlallillu qimaariarnerannik ajornartorsiummik ilaatigut pilersitsivoq.

Tamannalu tunngaviugalugu ataatsimiititaliap Kommuneqarfik Sermersuumi borgmesteri, Avaaraq Olsen (IA) suliamut atatillugu ataatsimiinnissamut aggersarpaa. Tamanna ullumi nalunaaqutaq 14.45 pissaaq, ataatsimiinnerlu 45 minutsinik sivisussuseqassasoq pilersaarutaalluni.

Kommunip pilersaarutaa

Borgmesterip apeqqutit assigiinngitsut nalunaajassavai. Bjørk Lange Olsen KNR-imut paasissutissiivoq:

- Eqqarsarpunga paaserusullugu: Pissutsit suna killiffigaa? Meeqqat sumiippat? Pissutsit qanoq ippat? Meeqqanut atatillugu qanoq pilersaaruteqartoqarpa? Nuuk Outdoorimiiginnassappat? Aappiuppat qanoq sivisutigisumik? Aamma ulloq unnuarlugu paaqqutarinniffinnut inissinneqavinnissaanut pilersaaruteqartoqarpa?

Ilaqutariinnut peqqinnissamullu ataatsimiititaliami siulittaasup tulliata aamma paaserusuppaa meeqqat nakkutigineqanngitsunut inissinneqannginnissaat kommunip qanoq qulakkeerniarneraa.

Kommuneqarfik Sermersuup Nuuk Outdoorimik suleqateqarnini, meeqqat arfineq-marluk takornarialerisut suliffeqarfiannut suli inissinneqaqqasut inissaannik nassaariaruni unitsinniaraa borgmesterip KNR-imut allakkatigut paasissutissiissutigaa.

Iliuuseqartoqartoqarnissaa piumasarigaa

Ataatsimiititaliap meeqqanut inuusuttunullu naalakkersuisoq, Aqqaluaq B. Egede (IA) siunersiuinissamut aggersarlugu akissuteqaqqummagu sapaatip akunnera sinnerlugu qaangiutinngilaq.

Bjørk Lange Olsen ataatsimiinnermit ingerlagami akissutissarsinermininngaanniit amerlanerusunik ilaatigut apeqqutissaqalerpoq. Taassuma oqarnera naapertorlugu ilorrisimaarnanngilaq.

- Naalakkersuisup, Aqqaluaq B. Egede tamakku siullertut kommunip naggataatigullu borgmesterip akisussaaffigigai oqaatigaa. Borgmesterip akisussaaffimmik tigusinissaa ajornartorsiutaasunullu aaqqiissuteqarnissamik iliuuseqarnissaa kissaatigaara, Bjørk Lange Olsen oqarpoq, nangillunilu:

- Avaaraq Olsenip ukiup affaata tulliani qanoq iliortoqarsinnaanera misissorneqassasoq oqaatiginikuuaa. Tamanna toqqissisimanarpaluppallaanngilaq. Ajornartorsiutaasunut ikununnga iluaqutaasinnaasunik aallartitsisoqarsimanersoq borgmesterimit tusarusuppara, ajornanngippat piaartumik.

Bjørk Lange Olsenip ataatsimiinnerup kinguneqarnissaa naatsorsuutigaa, ilungersunartumillu tigusisoqarnissaa neriuutigalugu.