Avaleraasartuunik nunami tunisassiortoqassanngikkallarpoq

Finn Karlsenimmi erseqqissaatigaa avaleraasartuut aalisakkanut allanut nunami tunisassiarineqartartunut naleqqiullugit allaanerussuteqartut. Avaleraasartuut nunatta imartaani siorna pisarineqartut, amerlanertigut umiarsuarmi qeritissinnarlugit suliareqqaarnagit avammut nioqqutigineqarsimapput.

Finn Karlsenittaaq erseqqissaatigaa avaleraasartuunik aalisarneq suli ineriartortinneqartoq, avaleraasartuullu ukiuni ikitsuinnarni amerlasuujullutik nunatta imartaaniissimasut, taamaattumillu nunatta imartaani avaleraasartuunik siunissami aalisartuaannartoqarsinnaanersoq suli nalorninartoqarluni.

- Tamatuma saniatigut aalisakkanut ukioq naallugu imartatsinniittartunut, soorlu raajanut qaleralinnullu sanilliullugu, avaleraasartuunik aalisarnissamut piffissaq sivikitsuararsuuvoq, siornalu juulimit septembarimut taamaallaat ingerlanneqarluni.