Aqqaluaq B. Egede IA-mi siulittaasumut qinigassanngortippoq
Partiip aaqqissuussaanera nutaaq tamanik peqataatitsisoq isummanillu katersuisoq pilersikkumavaa, erseqqissaavorlu siulittaasutut tunuaqqammersup Kuupik Kleistip tamanna amigaatigisimagaa:
-Ullumikkut pissutsit imaapput isorliunerusut nunaqarfimmiullu naalakkersuinikkut ingerlatsinitsinnut isummersueqataatinneqannginnerat, killeqarpallaarujussuarpoq.
Aqqaluaq B. Egedep politikkikkut ingerlanneqareersut saniatigut inuit pissakinnerusut, illoqarfiit isorliunerusut nunaqarfinnilu atukkat siuarsarneqarnissaannik suliniuteqarumavoq inuiaqatigiinnilu nammaqatigiinnermik toqqammavilimmik ingerlatserusulluni.
Inuit Ataqatigiit maajip 30-ani immikkut ittumik ataasiinnarmillu siunertaqartumik ataatsimeersuarnissaanni, tassalu siulittaasussarsiorluni ataatsimeersuarnissaanni maannamut qinigassanngortittut marlunngorput, sassartoq siulleq tassaavoq Folketingimi Inatsisartunilu ilaasortaq Sara Olsvig.
Aqqaluaq B. Egede oqarpoq Inuit Ataqatigiinni qinikkat ilaasa qinikkatut atuuffissatik aallartisimalaaginnartoq tunuaannartarnerat akerlilerlugu, assersuutitullu parteeqanni Maliina Abelsenip tunuarallarsimanera taavaa.
Sara Olsvigip Inuit Ataqatigiinni siulittaasutut qinerneqassagaluaruni Folketingimit tunuarnissani nalunaarutigereerpaa, unammillertigiligaata Aqqaluaq B. Egedep uparuassallugu tunuarsimaarfiginngilaa.
-Inuit Ataqatigiit mianersuuttariaqarpaat qinersisartorparujussuit qinigaaffimmi naammassisaqarnissamik piumasaqarnerat akisussaaffimmillu tunisinerat qimaannartarlugu ingerlatsisarnerit akuerinngimmassuk, periuseq tamanna isumaqatiginngilara. Inuit Ataqatigiinni qinersiseqarujussuartut pakatsisinneqartussaapput. Taanna akisussaaqataasutut isumaqatiginngilara aamma inuiaqatigiit uppernassusermik taamaaliornikkut amigaateqalissapput, tamatuma kingunerisanik Inuit Ataqatigiit innarlerneqarsinnaapput, Aqqaluaq B. Egede erseqqissaavoq.
Aqqaluaq B. Egede aperaarput unammillertiminut Sara Olsvigimut naleqqiutissaguni suut nukittuffiginerunerai, imalu akivoq:
-Isumaqarpunga misilittakkakka naammalluinnaqqissaartut. Nunatsinni aaqqissuussaaneq ilisimavara pissutsillu qanoq aaqqinneqarnissaannik ilisimasaqarlunga. Taamaammat uani nangaananga Inuit Ataqatigiit partiitut siulersussallugu piareersimasutut avammut nalunaaruteqarnissannut pisussaasutut misigisimavunga.
