Aningaasarsivik imigassartorpallaarnerlu ulapaartitsisut
Angerlarsimaffimmi eqqissiviilliornerit 14-iusimapput, taakkunanngalu marluk meerartaqarfiusimallutik. Aammattaaq aalakoortut tallimat imminut isumagisinnaajunnaarsimasut isumagisariaqarsimavaat, nakuusernerit aqqusinermilu perulluliortut arfineq marluk orniguffigisariaqarsimavaat aserorterillu tallimat aamma orniguffigisariaqarsimallugit. Kiisalu inuit sisamat imagassartorsimallutik biilimik ingerlatsisimasutut unnerluutigineqarsimapput.
Tallimanngormat unnuakkut nal. 02.50-p miss. inuit marluk imerniartarfiit ilaasa silataani parrallattut politiiniit naammattoorneqarput. Politiit eqqissisaaniarsaripput, aappaalu eqqissitinneqarpoq. Aappaali kamattupilussuulluni pinaaserpoq taamaattumillu tigusarineqarluni. Kamakkaluttuinnarmat qasilittunik seqqalittarneqarpoq, taamaalillugu eqqissitinneqarluini. Angut isertitsivimmi unnuisussanngortinneqarpoq ullaakkullu iperagaalluni.
Tamatuma saniatigut politiit ikiaroornartut pillugit inatsimmik unioqqutitsinerit arfineq pingasut suliarisimavaat, tassungalu atatillugu hashi 219,5 gram kiisalu aningaasat 86.600,00 kr.-it arsaarinnissutigineqarlutik. Immikkuttaaq taaneqarpoq arfininngornermi marsip aappaani 2012-imi nal. 04.00-p miss. nalinginnaasumik biilimik misissuinermut atatillugu biili politiinit unitsinniarneqartoq unigani qimaavoq, biilimillu aquttup biili biilinik inissiisarfimmut inississinnarlugu pisulluni qimaavoq. Politiillu pisummik malersorlugu tigusarivaat. Tigusarineqartoq imigassartorsimavoq, tamatumalu saniatigut qimaanermini igitaqarpoq, kingornalu paasineqarpoq hashimeq igissimagaa. Angut pineqartoq aningaasanik amerlasuunik paarisaqarpoq, taakkulu arsaarinnissutigisassanngortitassatut tiguneqarlutik. Kingorna angerlarsimaffia misissuiffigineqarpoq, tassanilu aamma hashi annertooq aningaasallu amerlasuut aamma nassaarineqarlutik. Angut 28-nik ukioqarpoq, killisiorneqarnermilu kingorna iperagaavoq kingusinnerusukkulli eqqartuussivimmut sassartinneqarnissani naatsorsuutigisinnaavaa.
Politit marsip aappaani nal. 09.00 arnamik 55-inik ukioqartumik pinngitsaaliisoqarsimaneranik nalunaarfigineqarput. Kingorna angut 49-nik ukioqartoq tigusarineqarpoq unnerluutigineqarlunilu. Tigusarineqartoq aqaguani inatsit tunngaviusoq naapertorlugu killisiugassatut eqqartuussivimmut sassartinneqarpoq ullunilu 28-ni tigummigallarneqarnissaa piumasarineqarluni, unnerluutigineqartut inatsisinik sakkortuumik unioqqutitsisimanera aammalu suliap ingerlanneqarneranik, takunnittunik innarlerneqartumillu sunniiniarluni akornusersuisinnaanera pissutigalugu. tigusarineqartut eqqartuussivimmit ulluni qulingiluani tigummigallagassanngortinneqarpoq. Tigusaasup eqqartuussutip inernera nunatta eqqartuussivianut suliareqqitassanngorteqqippaa.
