Aleqa: SAS nunatsinni pitsaanerusumik kiffartuussinissamut mattussivoq

SAS-ip Air Greenlandimi aktiaatimi tunineqarnissaat piffissami sivisuumi kissaatigisimavaa, SAS-illi aktianut akigitinniagaanik akileerusuttunik nassaarsimanani. Taamaammat nutaanik pisinissamut mattussineq Namminersorlutik Oqartussanik pinngitsaaliiniarnertut isiginiarneqarsinnaavoq. SAS-ip aktianik piginneqataassutai pisiarerusunneqaraluarput, SAS-illi akigitinniagai qaffasippallaarsorineqarlutik.

- SAS piginnittuujumajunnaarnerani ikiorusupparput pinngitsaalineqarlutali isumaqatigiinniarnissarput kissaatiginngilarput – tamanna kialluunniit akuerisinnaanngilaa, pingaartumillu Nunatsinni innuttaasut akuerisinnaanagu. Maanna danskit naalakkersuisuinut SAS-imik piginneqataasunut saaffiginnissaagut, SAS-ip Air Greenlandimik siunissami piginneqataanissaa pillugu pitsaasumik oqaloqatigiinnissaq qulakkeerniarlugu, taamaalilluta Nunatsinni ilaasunik angallassinermi sapinngisamik pitsaanerpaamik sullissinissaq qulakkeerniarlutigu, Aleqa Hammond nassuiaavoq