Akuersaanngilluinnarnissamik aalajangiussaqarneq atorunnaalerpoq

Inuussutissarsiornermut Aatsitassanullu Naalakkersuisoq Jens-Erik Kirkegaard, § 34 naapertorlugu apeqquteqqaammut akissuteqarnilu IA-mit toqqaannartumik apeqqutigineqartumut akivoq, Naalakkersuisut aatsitassanut qinngornernik ulorianartunik akulinnut akuersaanngilluinnarnissamik aalajangiussap atorunnaarsinneqarnissaa pillugu ukiakkut ataatsimiinnermi inatsisissatut siunnersuutiginiaraat.

Jens-Erik Kirkegaardip akissutimi erseqqissarpaa, piiaavinnut qinngornernik ulorinartunik akulinnut, soorlu ass. uranimik, ingerlaannaq akuersinermik tamanna akuersinertut isumaqanngitsoq.

- Piiaavissat tamarmik arlalinnik misissuiffigineqarlutillu akuersissutinik tunineqaqqaartussaapput. Suliniutit ataasiakkaat avatangiisitigut, peqqinnissamut, qinngornernik ulorianartunut tunngasutigut, isumannaallisaanermut inuiaqatigiinnullu tunngasutigut illersorneqarsinnaappata aatsaat akuerineqarsinnaassapput.

Jens-Erik Kirkegaardillu IA-mut akissutaa tunngavigalugu aviisip ullormut saqqummersartup Politiken inissisimaneq nutaamik nalilersuiffigaa.

Aviisi ilaatigut allappoq, Naalakkersuisut akuersaanngilluinnarnissamik aalajangiussap atorunnaarsinneqarnissaanik aalajangiussamik atorunnaarsitsiniarnerat naalagaafeqatigiinni inissisimanermik nutaamik pilersitsissasoq, nunammi pingasuusut - Kalaallit Nunaat, Savalimmiut Danmarkilu - qinngornernik ulorianartunik akulinnik piiaasoqannginnissaanik maannamut isumaqatigiissutigisimavaat.

Danskit kalaallillu suleqatigiissitaasa tamatumunnga tunngatillugu ajornartorsiutit pilersussat iluarsineqarnissaannik - ilaatigut kiap nakkutilliineq isumannaallisaanerlu isumagissaneraat, uranimillu piiakkat nunarsuarmi niuerfimmi tuniniarneqalissappata qanoq pisoqarnissaanik isertortumik suliaqarneranni, taamatut aalajangertoqarpoq.

Uranimi piiakkat ilaattut tuniniarneqartussaanngitsutut uninngatiinnarneqassanersoq imaluunniit Kalaallit Nunaat nunarsuarmi uranimik tunisassiortut annersaata ilaattut tuniniarneqassanersoq suli nalornissutigineqarpoq.

Tamatumalu nalornissutaanera Sara Olsvigip (IA) sammisaq pillugu Jens-Erik Kirkegaardimut apeqquteqartut pingasuusut ilaata iluaagivaa.

- Naalakkersuisut qanoq piniarnerinik oqaaseqartinnissaat ajornartorsiutigisupilussuuarput. Tamannalu tamat oqartussaaqataanerannut tunngatillugu ajornartorsiummik pilersitsivoq. Naalakkersuisut qinigaangamik ammasumik ingerlatsiniarlutik neriorsuutigaat, apeqqulli naalagaaffeqatigiit politikkiannik allanngortitsilluinnartussaq maanna inuiaqatigiinni pisariaqartumik oqallisigineqaqqaarani tuaviuunneqalerpoq, Sara Olsvig Politikenimut oqarpoq.