Air greenlandip timmisartuutaannut ilaaneq akisunerulissaaq
Air greenlandip nammineq nalililiinera naapertorlugu ikummatissat akitsornerat timmisartuutileqatigiiffimmut 15 millioninik akeqassaaq.
- Naatsorsorparput ukiumut 15 millionit missaanik naleqassasoq taanna massakkumut akitsuineq.
- Taannalu akitsuineq takorlooruminaappoq atuisunut sunniuteqanngitsoornissaa, tassa imaappoq akit billetinut akiutitaasut imaluunniit nassiussiniarnermut akigititaasut taakkua eqqorneqarnissaat pinngitsoorneqarsinnaassagunanngilaq, Air greenlandimi sulisoqarnermut pisortaq Mads Christensen taama oqarpoq.
Taassuma oqaatigaa, akit akitsornerat pissutigalugu soraarsitsisoqarnavianngitsoq, Air Greenlandimi pisariillisaalluni aallarteruttormat ileqqaarnikkut aningaasat ilaat pissarsiarineqarsinnaassasut oqaatigalugu.
- Atuisut pinngitsooratik eqqorneqannginnissaat takorlooruminaappoq, taavalu aamma saniatigut taakku sipaarniutigut neriuutigaagut soorunami attuinnginnerulaarnissamut sunniuteqarsinnaassasut, Air Greenlandimi sulisoqarnermi pisortaq Mads Christensen taama oqarpoq.
