Zelenskyj: USA-p Ukrainemi sorsunneq juunip aallartinnginnerani unitsinniaraa

USA-p Ukrainep Ruslandillu akornanni sorsunneq juuni nallertinnagu unitsinniarpaa.

Ukrainemi præsidenti, Volodymyr Zelenskyj, nutaarsiassaqartitsivik AFP-ip nalunaarutaa naapertorlugu, arfininngornermi taama oqarpoq.

Præsidentillu oqarnera naapertorlugu, USA illuatungeriit sapaatip-akunnerata tulliani oqaluuteqqinnissaannut qaaqqusisuunissaminik neqeroorpoq.

- Isumaqatigiinniartussat – Ukraine aamma Rusland – USA-mi sapaatip-akunnera ataaseq qaangiuppat ataatsimeeqatigiinnissaat, ilimanarpoq tamanna Miamimi pissasoq, USA-p siullermeerluni siunnersuutigaa, Zelenskyj oqarpoq.

Ukrainemi præsidentip oqarnera naapertorlugu, USA-p juunip aallartinnginnerani isumaqatigiissusiortoqarnissaa piumasaraa, taassumap ilassutigaa.

Isumaqatigiinniaqateqarnissaminut piareersimasoq

Ukraine isumaqatigiinniaqataaqqinnissaminut piareersimasoq, Zelenskyjip uppernarsarpaa.

USA-li Ukraine peqataatinnagu Ukrainep innarlerneqannginnissaa pillugu Ruslandimut isumaqatigiissuteqassappat, tamanna Ukrainep akueriumanavianngikkaa, præsidentip mianersoqqussutigaa.

Naak illuatungeriit akornanni isumaqatigiinniarnerit sapaatip-akunnerani matumani pigaluartut Ruslandip Ukrainemut saassussisaqattaarnini unitsinngilai. Ukrainemilu nukissiorfiit attaveqaasersuutai russinit arfininngornermi eqqugaapput.

Eqqisseqatigiinnissamut isumaqatigiinniarnerit Amerikamiut akunnermiliuttunngorlugit Abu Dhabimi ulluni marlunni ingerlanneqartut, Ukrainep Ruslandillu sisamanngormat naammassivaat – iluatsippallaanngitsumilli.

Zelenskyj naapertorlugu, Nunat taakkua Ukrainep kangiani Donbasip immikkoortuani aningaasaqarnikkut kiffaanngissuseqarneruffissatut taaneqartartoq akunnerminni oqaluuseraat.

Saassussisoqaqattaarnerani eqqisseqatigiinnissamik isumaqatigiinniartoqartoq

Naak De Forenede Arabiske Emiraterini ataatsimeeqatigiinnerup kingorna, eqqisseqatigiittoqarnissaa suli anguneqanngikkaluartoq, Ukrainep isumaqatiginninniarnermut pisortaa Rustem Umerov oqarpoq, "suliniutit tigussaasut aaqqiissutissallu atorluarsinnaasut“ oqaluuserineqartut.

Nunat taakkua marluk, Ukrainep maanna ukiuni sisamanngortuni tiguarniarsarineqarnera qanoq unitsinneqarsinnaanersoq isumaqatigiissutiginiarlugu, januaarip 23-anni 24-annilu siullermeerlutik naapipput.

Ruslandip Ukraine februaarimi 2022-mi tiguarniarlugu sakkutuulersorpaa. Sakkutuulersuineq sorsunnersuup kingulliup kingorna, Europami sorsunnerni toqutsiffiunerpaavoq.

Russit Ukrainemi nukissiorfiit attaveqaasersuutaannik saassusseqattaalerneranni, Abu Dhabimi isumaqatigiinniarnerit pipput.  

Tamanna illoqarfinni annerni, soorlu illoqarfiit pingaarnersaanni Kievimi, Ukrainep ukiuunerani silallu isserujussuarnerata nalaanni, kissartueruttoqaqattaarneranik innaallagiaaruttoqaqattaarneranillu kinguneqarpoq.

/Ritzau/