Wæver: Kujataani inuussutissarsiornikkut inerisaanissamut aningaasaliisoqartariaqarpoq

Kuultisiorfiup matunissaa inuit 60-it missaasa suliunnaartariaqarnissaannik kinguneqassaaq, akileraarutitigullu isertitat annaaneqarnerisa saniatigut kommuni ikiorsiinissamut aningaasartuuteqartariaqassaaq:

- Aningaasaqarnikkut imaannaanngitsunik unammilligassaqartut ilisimasimavarput. Soorunami ajuusaarnarpoq taakku qaammatini tulliuttuni kingunerisussanngormassuk maannakkut suliffeqarfiup matusariaqarnissaanik, Kommune Kujallermi borgmesteri Jørgen Wæver Johansen oqarpoq.

Nalunaq Gold Mine-ip matuneqartussanngornera inuit 50-it 60-illu missaat suliffeerunnissaannik kinguneqartussaassaaq, akileraarutitigullu isertitat annaaneqarnerisa saniatigut aningaasat 2,3 millionit koruunit missaat Kommune Kujalliup ikiorsiinissamut aningaasartuutigisariaqalissavai, suliffimminnik annaasaqarsimasut ingerlariaqqissinnaanissaat pillugu kommunit ikiorsiisinnaanissamut pisussaatitaammata.

- Aningaasat taakku annikittutut immaqa isumaqarfigineqarsinnaagaluartut uagutsinnut annertupput, isumaqarpungalu pinngitsoorsinnaanngikkipput paasissutissiissutiginiassallugu aamma Inatsisartunut matumani immikkut ittumik iliuuseqartoqarnissaa pisariaqartinneqarmat. Isumaqarpugut nunap immikkoortuani inuussutissarsiornikkut inerisaanermut tunngatillugu aningaasaliissutinik immikkoortitsisoqartariaqartoq, Jørgn Wæver Johansen oqarpoq.

Suliffeqarfiit matoorarneri, assigiinngitsutigulluunniit ajornartoortoqarnera pissutaalluni inuit amerlasuut kujataanit sinerissami illoqarfinnut allanut Danmarkimulluunniit nuuttartut takussaapput, inuussutissarsiutitigullu piorsaasoqarnissaa taamaammat pisariaqartoq, Jørgen Wæver Johansenip oqaatigaa:

- Aningaasar Kommune Kujallermi kaaviiaartinneqartut ikileriarneranni tamatta eqqornerlunneqartussaavugut, taamaammallu immikkut iliuuseqarnissamut pisariaqartitsivugut, Kommune Kujalliup borgmesteria Jørgen Wæver Johansen oqarpoq.