Vittus Qujaukitsoq KNAPK-miikkunnaartoq

Vittus Qujaukitsoq KNAPK-mi pisortaajunnaarpoq. Piniartut aalisartullu kattuffiat taama paasissutissiivoq.

- Suleqatigiinnerput unippoq, KNAPK-p siulittaasua, Pele Blytmann, oqarpoq.

Maannalu pisortaasimasoq illersorniarlugu annerusumik oqaaseqarsinnaanani nangilluni oqarpoq. KNAPK-lli immikkoortortaqarfiisa kissaateqarnerat malillugu taama aalajangerlutik paasissutissiissutigaa.

- Soorunalimi KNAPK immikkoortortaqarfiit kattuffigivaat. immikkoortortaqarfiillu piumasaqarnerat tusaanngitsuusaassagutsigu KNAPK-mut nalitoorujussuarmik kinguneqarsinnaammat, taanna pinaveersaarniarlugu taamatut qisuariarpugut.

Pele Blytmann oktobarip aallartilaarnerani siulittaasunngorpoq. Taamani siulittaasuuffigiligaata aningaasaatai ukiuni kingullerni ikileriartupiloorput. Aamma KNAPK-mi aningaasaqarneq siulittaasunngornerata kingorna ilungersunartoq taassuma oqaatigaa.

- KNAPK-p aningaasameerujussuarnera pisortap soraarsinneqarneranut soraarsitsinissinnut aamma nipilersoqataava?

- Annerusumik taanna oqaaseqarfigissanngilara, siulittaasoq  oqarpoq.

Aningaasaqarnerli maanna ukkatarineqartupilussuusoq ilanngullugu oqaatigaa. 

- Aningaasaqarnitta siumut saatinnissaa suliniutitta annersarisussaavaat. 

Aningaasaqarneq ilungersunartoq

KNAPK ilaasortat akiliutaannit aningasalersugaavoq.

KNAPK-mut ilaasortat tunitsivinnut, assersuutigalugu Royal Greenlandimut, tunisinerminni aningaasarsiassamik 1,5 procentiinik ilanngaatittarput, ilanngaataasullu tunitsiviit KNAPK-p qitiusumik allaffianut Nuummiittumut nassiuttarpaat.

KNAPK-p immikkoortortaqarfii, 2023-mi 69-iusut, siulittaasunngortup Pele Blytmannip oqarnera naapertorlugu aalisartut akiliutaasa ilaannik KNAPK-miit ukiumut ataasiarlutik nassinneqartarput.

KNAPK-p naatsorsuutai 2024-imut tunngasut suli saqqummiunneqanngillat. Taamaammat KNAPK aalisartut taamaalillutik akiliutaannit qanoq isertitaqartigisimanersoq KNR-imiit suli ilisimalinngilarput.

- Tassa ajuusaarnaraluartumik ukiup naajartornerani procentisiassaat tunniunneqartartut aningaasaqarnitta taamatut inissisimanerani masakkuugallartoq tunniussinnaanngikkallarpagut. Kisianni aningaasaqarnerput tunngavigalugu kittaartumik tunniunneqarnissaat siunniunnikuuarput. Peqatigiiffiit taanna paasilluarumaaraat neriuppunga.

KNAPK-mi siunnersortaasimasoq Niels Boassen KNAPK-mi pisortaagallartutut toqqaarneqareerpoq. Taannalu pisortassarsiussasoq Pele Blytmann paasissutissiivoq. KNAPK-lli pitsaanerusumut ingerlalernissaa aamma utaqqineqartariaqartoq, ilanngullugu oqaatigaa. 

- Kattuffiup KNAPK-p siumut saaqqinnissaa neriuutigaara. Aammami taanna pillugu sassarnikuuvugut. Aamma ullormiit ullormut sunaluunniit aaqqinneqarnavianngilaq. Kisianni KNAPK qinigaaffiup iluani ukiuni sisamani siumut saakkumaartoq neriuppunga.

KNAPK-mik suleqatigiinneq isumaqatigiissuteqarnikkut taamaatinneqartoq, Vittus Qujaukitsup KNR-imut uppernarsarpaa.

Taanna KNAPK-mut ukiuni pingasuni qaammatinilu qulini suliffigisaminut qujassuteqarpoq.