Uummannami eqqaavissuarmi eqqakkat amerliartuinnartut
Uummannami eqqaavissuarmi eqqakkat amerliartuinnarput. Kommunalbestyrelsip inatsit naapertorlugu eqqakkanik igitsisarnissaq isumagisaraa. Kommunilli nammassisinnaasai eqqagaqassutsimut naapertuutinngitsut, kommunalbestyrelsimi ilaasortap nassuerutigaa.
Allattoq Jonna Enoksen Dahl, Bikki P. Kleist
juulip 24-at 2026 15:20
Uummannami eqqaavissuarmi eqqakkat amerlasut takuneqarsinnaallutillu naamaneqarsinnaapput.
Taanna pissutaalluni illoqarfik aasaanerani niviugappassuaqalertartoq uummannarmiup Sofie Nielsenip KNR-imut oqaluttuaraa.
-Eqqaavissuaq eqqarsaatigalugu taamannaannaavik ulikkaartuaannaavilluni pigami taavalu aasakkut niviuganerusujussuartarluni, ikinneqaraluaraangamilu oqartussanit qamisarneqartarluni.
Sofie Nielsen
Uummannami eqqaavissuaq illoqarfiup avataani avinngarusimalluni inissisimavoq.
Eqqaavissuaq innuttaasunut illoqarfimmullu ajornartorsiutaalersimasoq Uummannami innuttaasup Niels Kristian Gabrielsenip oqaatigaa.
-Eqqaavissuaq avani akianiippoq. Illoqarfiup akianiittut assorujussuaq aamma niviugaqartaramik malunnartumik kisianni siornarnit massakkut niviugakinnerusoq malunnarpoq.
Niels Kristian Gabrielsen
Eqqakkanik poortuineq uninngasoq
Avannaata Kommunia Kalaallit Nunaat tamakkerlugu Eqqagassalerinermut piginneqatigiiffimmi ESANI A/S-imi 2019-mili ilaasortaajunnaarpoq, kiffartuussinissamulli isumaqatigiissuteqarluni.
ESANI Avannaata Kommuniani sumiiffinnut tallimanut eqqakkanik aallertassasoq isumaqatigiissutaavoq. Inoqarfinni mikinerni eqqakkat assartornissaat kommunip nammineq isumagisaraa.
ESANI-p kommunini sisamani illoqarfinniit nunaqarfinniillu eqqakkat poortorneqarsimasut aaneqarnissaat isumagisarpaa. Eqqakkat amerlanertigut Sisimiunut umiarsuakkut assartorneqartarput, tassanilu ikuallaavimmi ikuallanneqarlutik.
Kisianni aamma illoqarfimmi eqqakkanik poortuinissaq ajornarsimasoq, Uummannap kommuniani teknikkeqarfimmi sulisup Jarte Korneliussenip oqaluttuaraa.
-Poortuineq massakkut ingerlattussaagaluarpaat. Maskiinanik ajutooqqapput, massakkut tikkuinnaqqapput. Kisianni neriuutigigaluarparput ulluni qaninnerni aaqqinneqassasut.
Jarte Korneliussen
Kommunalbestyrelsit suliniuteqarusuttut
Kommunalbestyrelsip, inatsit naapertorlugu, eqqakkanik igitsisarnissaq isumagisaraa.
Innuttaasullu isornartorsiutaat kommunip tusaagai Avannaata Kommuniani teknikkimut ataatsimiititaliami siulittaasoq Sakio Fleischer oqarpoq.
-Sukataaruteqassaagut soorunami aamma innuttaasut oqariartuutaat tusaavagut aamma taakku piumasaqaateqarput allatut aaqqiisoqartariaqartoq.
Aammali illoqarfiup eqqagaqassusianut kommunip piginnaasai naapertuutinngitsut nassuerutigaa:
-Massakkut eqqavissuatta ulikkaaqattaarluni pinera annertuumik ajornartorsiutigaarput. Taannalu aamma ilungersuutigalugu arlaleriarluta saaffiginnissutigisarparput namminersorlutik oqartussanut.
Sakio Fleischerip Namminersorlutik Oqartussat Uummannami eqqaaveqarneq iluarserusullugu suleqatigerusuppai.
-Piviusunngortitsisoqassappat isumaqarpunga oqaloqatigiinneq annertuumik erseqqissumillu paaseqatigiittumik ingerlattariaqartoq. Aaqqiissutissat uagutsinnut naleqquttut soorlu avannaa sikusartuuvoq, sikusartumi aaqqiissutinik nassaarsinnaasuugutta ajunngitsumik taava ajornartorsiut milliartuaartissinnaavoq.
Sakio Fleischer
Ammaannartumik ikuallaanissamut akuersisoqartoq
Eqqakkat pillugit Namminersorlutik Oqartussat nalunaarutaat 2021-meersoq naapertorlugu eqqakkat ikuallanneqarnissamut naleqquttut taamaallaat ikuallanneqarsinnaapput.
Ikuallaaveqanngippat imaluunniit ikuallaavik peqquteqartumik atorsinnaajunnaarpat ammaannartumik ikuallaanissamik Naalakkersuisunut immikkut akuerisamik qinnuteqarnissaq 2025-mi periarfissaalerpoq.
Avannaata Kommunia ammaannartumik ikuallaanissamut 2024-mi immikkut akuerisaavoq.
Ammaannartumik ikuallaanissamut immikkut ittumik ukioq manna akuerisaaqqippoq, akuersissut septembarip 15-iata tungaannut atuutissaaq. Avatangiisinut nalaakkersuisoq Jørgen Rosbach nutaarsiassaqartitsivimmut Sermitsiamut taama oqarpoq.
Uummannami eqqaavissuaq
