Uummannami aasaanerani sulisussaaleqineq ajornartorsiutaasoq

Uummannami sulisussaaleqineq suliffeqarfiit arlallit ajornartorsiutigaat. Suliffeqarfiit meeqqerivik, Pilersuisoq aamma utoqqaat illuat sulisussaaleqipput.

Allattoq Jonna Enoksen Dahl, Bikki P. Kleist

aggustip 04-at 2026 16:03

Meeqqerivik Ikinnguteeqqat 2021-mi ammaanersiorneqarpoq, sulisussaaleqisoqarneralu peqqutigalugu aasaq manna matoqqatinneqarallarpoq.

Lola Mørch ilinniartitsisuuvoq, meerailu marluk meeqqerivik Ikinnguteeqqaniipput. Meeqqerivik Ikinnguteeqqani sulisussaaleqisoqarmat meerai meeqqerivimmut allamut nuutsinneqarallarput.

- Assersuutigalugu sapaatip akunneranut ullut ilaanni ullut marluinnaat meeqqaniittarput sulisussaqanngimmata, Lola Mørch oqarpoq nangillunilu:

- Ukiorli misigisalerparput meeqqanukaassigutta sulisut amigarpata nammineq anniseqqinngikkutsigit sivikitsunnguup iluani meeqqaniilaariarlutik sulisut sianertarnikuupput aaqqullugit sulisut ikippallaarmata.

Meeqqerivimmi sulisussaaleqisoqarmat Lola Mørchip aappanilu meeqqatik paarlakaajaallugit angerlarsimaqatigisariaqartarsimavaat, tamannalu sulinerannut sunniuteqarpoq.

- Uanga timelæreriugama, atuarfimmi atuartuutikka aamma eqqortarlugit freertittariaqartarlugit uffa sulisinnaagaluarlunga.

Pilersuisumi allakkerivimmi sulisup Jensine Tobiassenip meeraa aamma Ikinnguteeqqaniittarpoq. Namminerlu aamma sulinngitsoortariaqartarsimavoq.

-Angerlartitsisoqartillugu uanga nammineq angerlarsimaffinni ilagisarpara sulinngittariaqartarpunga allatuulli.

Meeqqerivik Ikinnguteeqqani sulisussaaleqineq pissutigalugu, aggustip aallaqqaataata tungaanut matoqqatinneqarallartoq angajoqqaat paasitinneqarput, matoqqatitsinerlu aggustip 14-iata tungaanut sivitsorneqartoq Avannaata Kommunia nalunaaruteqarpoq.

Meeqqerivimmi sulilertut sivisuumik sulineq ajortut Lola Mørchip aamma oqaatigaa, ajornartorsiullu taamatut ingerlaannassappat angajoqqaat ernumapput.

- Soorunami una eqqarsaatiginartorujuuvoq kikkut sulissappat? Meeqqat qanoq nakkutigineqassappat? Taavalu meeqqanut kingunissaa suuamita? Lola Mørch oqarpoq.

Uummannami Pilersuisumi aaqqiissuteqartut

Uummannami Pilersuisumi sulisussaaleqisoqarnera aamma ajornartorsiutigaat.

Pilersuisumi pisortap Birte Eriksenip aasaanerani sulisussaaleqineq ajornartorsiutaasartoq nassuiaatigaa.

-Taanna aamma uagutsinnut malunnartarpoq, soorlu ulluni makkunani malugisimavarput, soorlu sulisutoqqat ferienngittut napparsimappata sunniuteqassooq, paarlatseqarniarneq ajornartorsiutigigatsigu.

Pilersuisumi sulisussaaleqineq siornali ajornartorsiutigaat, ukioq mannalu aaqqiissummik nassaarsimapput.

- Aap feriereerpata ferierumaarpugut allatut ajornaqaaq, sulisussat ajornartarnera tunngavigalugu taavalu pisisartugut pissaqartittariaqaratsigit pisiniarfik imaqartariaqarami. Taanna oqaloqatigiissutiginerani suleqatigiilluta isumaqatigiissutigalugu massakkut oqinneeraavoq taamannak ingerlagatta, Birthe Eriksen oqarpoq.

Utoqqaat illuanni ineqartut eqqugaasut

Aasaanerani inuleriffiusuni sulisoqarniarnikkut ilungersunartuusoq avannaata kommuniani Innuttaasunik Sullissivimmi pisortap Aningaaq Fleischerip oqaatigaa.

Margrethe Løvstrøm Sorlaqarfimmi najugaqarpoq, sulisussaaleqinerlu najugalinnut sunniuteqarnerluttartoq oqaatigaa.

- Tassa ajorisanngikkaluarpara ilaanni sulisussaaleqileraangatta angerlarsilaaginnartarama. Nuanneraluarpoq, ikilingaangamik imannak nuannarunnaapajuttarami.

Najugaqartut ilaat Ulrikka Mathiassen utoqqaat illuannut siorna nuuppoq. Maaniinninilu nuannarigaluarlugu sulisussaaleqisoqartillugu ilaatigut ikiuuttariaqartarsimanerarpoq.

- Utoqqaat ukua qasuersaarfiat kisianni sulisoqarniarnikkut ilaanni ajornakusoortarpugut ullaakkut utaqqisariaqartarpugut nerinissatta tungaanut, ikiorneqartarpugut ilaanni unnuarsiortunit, ilaanni ikiuukkiartortarpunga uanga.

Aalisaleruttorfiulli nalaani sulisussaaleqinermik utoqqaat kisimik eqqugaaneq ajorput.

Salamina Nielsenip utoqqarni ullaakkoortuulluni sulinini nuannarigaluarlugu ilaanneeriarluni freersinnaanissaminut periarfissakittarpoq.

- Utoqqaat sullitakka aqagu friissallunga oqarfigigaangakkit namminneerlutik akisarpaannga ´kiammi taava ornissuaatigut?´ - soorunami oqaatsit taakkua ilaanni artornartarput, taama sulisussaaleqisoqartigivoq.

Utoqqaallu sulisunut nukissamik tunisisaraluartut Salaminap taama suliinnarnissani apeqqusertalerpaa.

- Nammineq massakkut oqarsinnaavunga qasulerama soorunami sulititsisuma taavalu utoqqaat iluatigigaluarpaanga suliffinnut allamut timinnut naleqqunnerusumik ujartuerusunneq taanna takkuttarpoq.

Sorlaqarfinnimi iggavimmi aqutsisussamik immikkoortortaqarfimmilu aqutsisussamik aamma amigaateqarput, sulisooreersullu suleruluttartut pisortap tullersortaatut taartaasup Ane Johansenip oqaatigaa.

- Imaannaanngittorujussuuvoq, sulisussanik ilaanni sussaqanngiiviusalluta aallartittarpugut ullormut. Unnuarsiortut soraarneq ajulertut tamakkua nalaattaarpavut ilungersunartorujussuarmik.

Pinasuartumik inissiigallartoqartaraluartoq, inissat maani 25-t tamakkerneqarsinnaasanngillat.

- Init arlaqalaartunnguit inoqanngikkallarput pissutigalugu sulisoqarniarneq aamma taamaatsillugu inuutsigitillugu tigooqqaaginnarsinnaannginnata, Ane Johansen oqarpoq.

Sulisussaaleqisarneq aaqqiivigineqassappat akissaatit aamma qiviarneqartariaqartut, Ane Johansen isumaqarpoq.

- Neriuutiginerpaasaralu unaavoq akissaatitigut aaqqiivigineqarnissaq taava maani sulisuugaluit arnaagaluilluunniit massakkut aalisartaramik, taakkua akisunerummata taakkua tigusariamikkit taamaalilluta manna inussaarullugu. Ajunngittussiaqartitaaneq atunngittorujussuvoq suleruluttuni taakkua qanoq iliuuseqarfigineqarnissaat kissaatiginarnerpaavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.