Uuliasiorfik akuersissuteqarfigineqarani atortunik Nerlerit Inaannukaassisoq

Suliffeqarfiit 80 Milep aamma Greenland Energy Companyp atortorissaaruterpassuit Tasiilamiit Mittarfimmut Nerlerit Inaannut nuussorpaat.

Inuussutissarsiornermut Aatsitassanullu naalakkersuisoqarfik tusagassiuutinut nalunaarummi allappoq.

Danskit tusagassiorfiata misissuisartup Danwatchip suliffeqarfiit atortunik assartuisut oqaloqatigai. Assartuinermik suliffeqarfiup Greenland Energy Companymit attartorneqarnertik uppernarsarpaa, atortullu Amerikamiut Nunap Qeqqani uuliasiornermi suliniutaannut atorneqartussaallutik.

Uuliasiorfiit Inuussutissarsiornermut Aatsitassanullu Naalakkersuisoqarfimmut paasissutissiinatillu akuersissummik qinnuteqaqqaaratik assartuipput.

Naalakkersuisoqarfiup pisortaata suliffeqarfiit atortunik nunamukaassinissamut akuersissuteqarfigineqanngitsut, KNR-imut siusinnerusukkut paasissutissiissutigaa.

Nunamukaassiinnarsimappulli – kisianni Nunap Qeqqanukaannagit qanittuanulli.

Akuersissummi pigisaqartoq "siunissami assartuinissat tamarmik suliarineqannginneranni aatsitassanut oqartussanut nalunaarutigineqarlutillu akuerineqaqqaartarnissaannik" "sukannersumik maanna mianersoqqussuteqarfigineqassaaq".

Mittarfimmi toqqorsineq

Suliffeqarfiit siuttuata, Roderick McIlreep suliffeqarfiit atortunik Mittarfimmi Nerlerit Inaanni maanna toqqorsimasuutigineqarallartunik nunamukaassisimanertik KNR-imut uppernarsarpaat.

PIsortanngoqqammersup oqarnera naapertorlugu suliffeqarfiit Greenland Airports toqqorsimasuuteqarnissamut isumaqatigiissuteqarfigaat.

Atortut suliffeqarfiit sumiiffimmi misissuinissami qinnuteqaatiminnik akissuteqartoqarnissaanut utaqqineranni sinerissap avataaniissimapput.

Taamaammat atortut oqartussat qinnuteqaammik isumaginninnerminnik naammassinninnissaata tungaanut mittarfiup toqqorsivianut assartorneqarlutillu inissinneqartut, Roderick McIlree oqarpoq.

- Toqqorsimasuuteqarallarneq sumiiffimmi suliaqarnermik aallartitsinerunngilaq. Atortut akuersissutit pisariaqartut naammassineqartinnagit sumiiffimmut assartorneqarnavianngillat imaluunniit Nunap Qeqqani akuersissuteqartut tunngavigalugit atorneqarnaviarnatik, Roderick McIlree oqarpoq.

Pisortaq tupattoq

White Flame Nunap Qeqqani akuersissutinik pigisaqartoq toqqorsimasuuteqarallarnermut aaqqissuussinermut 15.000 dollarinik (100.000 kr.-nik ataatilaarlugit) sapaatip akunneranut akiliuteqartassasoq, Roderick McIlreep paasissutissiissutigaa.

Taanna suliffeqarfiit atortunik nunamukaassinnginnerminni naalakkersuisunut oqartussanulluunniit attuumassuteqartunut allanut ilisimatitsisimanersut akissuteqanngilaq.

Suliffeqarfiit containerinik, atortunik oqimaatsunik qulimiguulimmillu nunamukaassiniartut, Roderick McIlreep KNR-imit sapaatip akunnerani matumani siusinnerusukkut apersorneqarnermini oqaatiginngilaa.

Taanna nassuiaateqarnermini ima oqarpoq:

- Tamanna ajornartorsiuterujussuusorinngilara. Toqqorsivik akuersissuteqarfigineqarnissatta tungaanut atortunik uninngatitsiffigaarput.

'Periuseq nalinginnaasoq'

KNR-ip Nerlerit Inaanni mittarfiup pisortaa, Morten Mandrup mittarfiup uuliasiorfiillu akornanni isumaqatigiissummut atatillugu paasiniaaffigalugu attaveqarfigaa. Taannali oqaaseqarumanngilaq, Greenland Airportsillu attaveqatigiinnermut immikkoortortaanut innersuussilluni.

Greenland Airportsip uuliasioqatigiiffik atortunik Nerlerit Inaanni Mittarfimmi uninngatitsinissamut isumaqatigiissuteqarfigisimagitsik KNR-imut uppernarsarpaa.

Greenland Airportsip toqqorsiviit atuisunut assigiinngitsunut matumani suliffeqarfinnut ilaatigut aatsitassanut takornariaqarnermullu tunngasunik suliaqartunut attartortittarlugit KNR-imut uppernarsarpaa.

- Isumaqatigiissut maanna piusoq periutsit nalinginnaasut aamma atuisartunut allanut isumaqatigiissutigineqartartut malillugit isumaqatigiissutigineqarpoq. Atortut Greenland Airportsip atuisunut allanut toqqorsimasuuteqarfissatut neqerooruteqartarfigisaanut inissinneqartut, Greenland Airportsimit Stine Buur Hvistendahl allappoq.

- Tamanna Nerlerit Inaata Mittarfiata eqqaani neqeroorutigisarparput, toqqorsimasuuteqarnerlu mittarfiup ingerlanneqarneranut aamma timmisartukkut isumannaallisaanermut sunniuteqanngilaq. Greenland Airportsip atuisunut toqqorsimasuuteqartitsigallarnissamik neqerooruteqarneq kisimi peqataaffigaa.

Greenland Airportsip uuliasioqatigiiffiit suliaqarnerannut imaluunniit oqartussanut attuumassuteqartut allat pillugit apeqqutit oqartussanut attuumassuteqartunut suliffeqarfinnullu taakkununnga innersuussutigai.