USA Ukrainep illersornissaqarfianut ikiorsiissuteqartoq
Ukrainep illersornissaqarfiata 8 milliardit dollarit nalinginut USA-mit ikiorsiissuteqarfigineqalernera USA-p præsidentiata Joe Bidenip nalunaarutigeqqammeraa, nutaarsiassaqartitsivik Reuters allappoq.
Tassa 53 milliardit koruunit missaat.
Qaartartoq sumiiffinnik aalajangersimasunik eqqorsisinnaasoq ikiorsiissutinut ilaavoq. Qaartartoq pineqartoq 130 kilometeritut isorartutigisumik igeriunneqarsinnaavoq.
Aningaasat Ukrainemut ikiorsiissutissatut tunissutigineqartut ilaat Joe Bidenip taassuma saniatigut immikkoortinniarpai, USA-p sakkussianik Ukrainemut pisinissaanut ilaatigut atorneqassallutik. USA-p nammineq sakkussiaminik taamaasilluni tunissuteqartariaqassanngilaq.
Ukrainep silaannakkut saassunneqarnermi imminut illersorsinnaanissaa anguniagaasoq nalunaarutigineqarpoq.
Ukrainep præsidentiata Volodymyr Zelenskyj-p Ukrainep Ruslandimut sorsunnera pillugu USA-p inatsisartuinut kongressimut ullumi sisamanngornermi oqalugiartussaanerani, Biden taama nalunaaruteqarpoq.
USA-p Ukrainemut tunissuteqarnera Zelenskyj-p inoqatinut attaveqaqatigiittarfikkut X-ikkut qujassuteqarfigaa.
- Ukrainemi innuttaasut sakkutuuttalu sinnerlugit qaninnertut iligisatsinnut USA-mut qujassuteqarusuppunga, Zelenskyj allappoq.
Rusland Ukrainemik saassussilermalli, USA Ukrainemut sakkussianik aatsaat tunissuteqalinngilaq.
USA-p sakkussiaqarnikkut Ukrainemut septembarip ulluisa arfernata tungaanut tunissutigisimasai katillugit 377 milliardit koruuninik naleqarput.
