USA-p nunanut allanut ministeriata issittumi suleqatini Sverigemi ataatsimeeqatigissagai
Nunat Natomut ilaasortaasut nunanut allanut ministerii Helsingborgimi Sverigemiittumi sapaatip-akunnerani matumani ataatsimiilerpata, USA-p nunanut allanut ministeria Marco Rubio peqataassaaq.
Rubiop suleqatini "Issittumi nunani arfineq-marlunneersut“ "Issittumi aningaasaqarnikkut isumannaallisaanermilu ataatsimut soqutigisat“ eqqartorniarlugit tassani ataatsimeeqatigissavai.
Taama USA-mi nunanut allanut tunngasunut ministereqarfik nittartakkamini allappoq.
Marco Rubio Natop ataatsimeersuarnerani, maajip 21-anni 22-annilu pisussami, tallimanngornermi maajip 22-anni oqalugiassaaq.
Aammattaaq Sverigep ministeriunera Ulf Kristersson aamma Natop qullersaa Mark Rutte ataatsimeeqatigissagai ministereqarfik ilisimatitsivoq.
Nunanut allanut tunngasunut naalakkersuisoq Múte B. Egede (IA) Helsingborgimut sulinerminut atatillugu marlunngormat aallarpoq.
KNR-ip Nunanut Allanut Naalakkersuisoqarfik Múte B. Egedep Helsingborgimi tikeraarnermini Marco Rubio ataatsimeeqatigissaneraa, aperaa. Tamanna erseqqissumik akissutisiffigineqanngilaq, allassimavorli naalakkersuisoq nunanut allanut ministerit ataatsimiinneranni peqataassasoq.
Ritzaup Danmarkimi nunanut allanut ministereqarfik aperaa, nunanut allanut ministeriugallartoq Lars Løkke Rasmussen Rubiomik ataatsimeeqateqassanersoq.
Danmarkimili ministereqarfiup uppernarsarpaa, taanna "Natomi issittumi naalagaaffiit allat“ ataatsimeeqatiginiarlugit, pilersaarutit malillugit Helsingborgimiissasoq.
Tatineqarneruleraluttuinnartoq
Løkkep nunanullu allanut taamani naalakkersuisuusup Vivian Motzfeldtip (D) suleqatertik Amerikamiu, kikkut tamarmik Washington D.C.-mut malinnaaleruttorneranni januaarimi kingullermik ataatsimeeqatigaat.
USA-p vicepræsidentia J.D. Vance aamma nunanut allanut ministeri Marco Rubio tassani ataatsimeeqatigaat.
Løkke kingusinnerusukkut oqarpoq illuatungeriit “unneqqarillutik angusaqarfiusumilli oqaloqatigiissimasut”.
USA-p præsidentiata Donald Trumpip Danmarki Kalaallit Nunaallu tatinerulermagit ataatsimiinneq piviusunngorpoq. Taassumap Kalaallit Nunaat isumannaallisaaneq pissutigalugu USA-mit tiguarneqartariaqarnera arlaleriarluni kalerriutigaa.
Donald Trumpip Issittumi isumannaallisaanikkut pissutsit eqqarsaatigalugit Kalaallit Nunaat Amerikamut ilanngunnissaa piumasaraa, Rusland Kinalu USA-mut navianartorsiortitsisutut isigigamigit.
/ritzau/
