USA-p Kalaallit Nunaat Northcom- kommandomut inissinniarlugu isumaliutersuutigigaa

Kalaallit Nunaannik akisussaaffiup nuunnissaanut amerikamiut isumaliutersuutaat, qallunaat illersornissamut ministeriata Troels Lund Poulsenip ilisimavaa.

Allattoq Ritzau

maajip 11-at 2025 13:11

Nutserisoq Karla Heilmann

USA-p illersornissamut akisussaaffiit agguataarneri allanngortinnissaannut pilersaaruteqarput, taamaalilluni Kalaallit Nunaannut akisussaaffik siunissami allamut nuunneqassaaq.

USA-p Kalaallit Nunaanni sakkutooqarnera amerikamiut europami sakkutooqarfiata ullumikkut akisussaaffigaa.

Siunissami Kalaallit Nunaat, amerikap avannaani illersornissamut sakkutooqarnikkut tapersiineq isumagisarisaata Northcom-kommandop ataanut inissinneqarsinnaasoq CNN allappoq.

Qallunaat naalakkersuisuisa Kalaallit Nunaannilu naalakkersuisut amerikamiut pilersaarutaat ilisimagaat, qallunaat illersornissamut ministeria Troels Lund Poulsen (V) TV2-mut oqarpoq.

- Naalagaaffiup naalakkersuisullu amerikamiut isumaliutersuutaat ilisimavaat. USA-p sakkutooqarnikkut akisussaaffinnik agguataarinissamut ilusilersuinissaat soorunami amerikap suliassaraa, allakkatigut akissummi allaqqavoq.

Præsident Trumpip Kalaallit Nunaat pillugu suli uteqqiasumillu apeqquteqartarnera ilutigalugu amerikamiunit isumaliutersuuteqalerneq pivoq.

Issittup Amerikamilu nunat immikkoortui isumannaatsuunissaannut qulakkeerisussatut, Amerikap Kalaallit Nunaat atorfissaqartikkaa Trumpip arlaleriarluni oqaatigisareerpaa.

Isumaqatigiissuteqarnissamik neqeroorneq

Manerassuarmi qeqertaaqqanut arlalinnut amerikamiut ingerlataat assigalugit, USA Kalaallit Nunaannut Free Associationimik taaguutilimmik neqeroorniarlutik pilersaaruteqartorooq tallimanngormat Reuters oqarpoq.

Taanna USA-mit aningaasaqarnikkut tapersiinissamut amerikamiillu illersorneqarnissamut periarfissiissaaq.

Amerikamiulli kalaallit illersornissamut politikkiannik aalajangiisinnaanngortussaassapput.

Danmarki USA-lu 1951-imi illersornissamut isumaqatigiissuteqarnerisa Kalaallit Nunaanni amerikamiut sakkutooqarfiliorsinnaanngortippaat, nunallu illersornissaa anguniarlugu sakkussanik atortunillu eqqussuipput.

Ilaatigut Uummannami Thule-basenimik ilisimaneqartumik maanna Pituffik Space Basemik ateqartumik sakkutooqarfiliortoqarpoq.

/ritzau/

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.