Politiit ullormut nalunaarutaat: Unnerluussinerit pinngitsaaliinermut tunngasut pingasut

Pinngitsaaliisoqarsimaneranik nalunaarutiginninnerit pingasut, suliat nakuusernermut tunngasut Maniitsumilu suliaq ujajaanermut tunngasoq inummut savimmik siorasaariffiusimasoq, ullup unnuallu ingerlanerani ulapputigineqarsimasut politiit oqaatigaat.

Allattoq Victoria Julie Schou

septembarip 14-at 2025 17:04

Nutserisoq Medea Olsen

Politiit ulloq unnuarlu kingullermi ulapissimasut, politiini pigaartut pisortaat Aputsiaq Hansen oqarpoq.

Suliat arlallit nakuusernermut, aqqusinermi angerlarsimaffinnilu eqqissiviilliornernut pisunullu imigassartornermut attumassuteqarsimasunut tunngapput. Suliallu taakku saniatigut nunap immikkoortuini assigiinngitsuni pinngitsaaliisoqarsimaneranik politiinut nalunaarutiginninnerit pingasuupput.

Suliani taakkunani pingasuusuni politiit tigusarinnissimapput, suliallu aappaani pasineqartoq eqqartuussivimmut ullumi sassartinneqassaaq.

Pinerlineqartut eqqarsaatigalugit politiini pigaartut pisortaat paasissutissanik amerlanerusunik oqaatigisaqarsinnaanngilaq.

Maniitsumi savimmik siorasaarineq

Aamma ullaaq nalunaaqutaq 06.52 politiit Maniitsumi inuk savimmik sioorasaarneqarlunilu aningaasanik piumaffigineqarsimasoq pillugu nalunaarfigineqarput.

Ujajaaffigineqartoq ujajaanermut atatillugu innarlerneqarsimanngilaq, aningaasaatinili tunniussimavai.

Pisoq Esbjergip Aqqutaani pivoq.

Politiit suliamut tassunga atatillugu takunnissimasinnaasunik ujartuipput, pinerliisorlu angut kalaalerpasittutut, 20-30-t akornanni ukiulittut, 175-185 centimeterisut angitigisutut, qernertumik nasartalimmik tujuuloqarsimasutut nasartaanillu nasaqqasimasutut oqaatigineqarpoq.

Ilulissani ujajaaneq

Ilulissani angummut ippassaq nakuusertoqarsimanera ujajaasoqarsimaneralu suliarlu misissorneqartoq politiit ippassaq nalunaarutigaat.

Tamatuma kingorna inuit marluk tigusarineqarput iperagaaqqillutilli.

Suliaq nakuusernertut oqaatigineqartoq ujajaanerinnanngortinneqarpoq.

Politiit suliamut atatillugu takunnissimasinnaasunik ujartuiunnaarput.

Paamiuni suliaq nakuusernermut tunngasoq

Paamiuni ippassaq ullaakkut nakuusertoqarsimaneranik politiit nalunaarfigineqarput.

Arlalinnik tigusarinnittoqarsimavoq, tigusarineqartulli iperagaasimapput.

Naak sapaatip-akunnerata naanerani pisut amerlagaluartut, suliat tamarmik politiinit misissorneqartut aqqusinernilu pisoqarfiusuni angallanissaq ernummatigineqassanngitsoq, politiit pigaartuisa pisortaata Aputsiaq Hansenip erseqqissarpaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.