Ukrainemut milliardilikkuutaanik aningaasaliissutissatut siunnersuut USA-mi Senatimi akuersissutigineqartoq
Ikiorsiissutissatut milliardilikkuutaanik aningaasaliissutissatut siunnersuut, USA-mi inatsisartut aappaanni Senatimi ippassaq marlunngornermi unnukkut akuersissutigineqarpoq, 661 milliardit koruuninik aningaasartaqarluni.
Taakkunannga 425 milliardit koruunit Ukrainemut ikiorsiissutissatut aningaasaliinerupput.
Aningaasaliissutissatut siunnersuut aqqutigalugu assersuutigalugu Israel 181 milliardit koruuninik aningaasaliiffigineqassaaq Taiwanilu 55 milliardit koruunit missaannik aningaasaliiffigineqassalluni.
Ikiorsiissutissatut siunnersuut USA-mi innuttaasut sinnerlugit sinniisoqarfimmi Repræsentanternes Husimi amerlanerussuteqartunit qaammatini arlalinni akerlerineqariarluni maanna akuersissutigineqarpoq.
Inatsit atuuttussanngortillugu ullumi pingasunngornermi atsiorniarlugu, præsidentip Joe Bidenip nalunaarutigisareerpaa.
USA-mi demokratit senatimi amerlanerussuteqaqqalaarput, demokratit 51-inik ilaasortaatitaqarlutik republikanerit 49-llutik.
Ikiorsiissutissatut siunnersuut maanna akuersissutigineqartumut assingusoq senatimi siusinnerusukkut akuersissutigineqareerpoq, Repræsentanternes Husimili itigartitsissutigineqarluni.
Senatimi taasineq suli naammassineqanngilaq, ilaasortalli 75-it akuersereermata siunnersuut akuersissutigineqareerpoq, 17-illu siunnersuummut akerliullutik.
