Ritzau

Ukraine USA-lu aatsitassat pillugit isumaqatigiissusiortut

Ukrainep aatsitassanik qaqutigoortunik 500 milliardit koruunit nalinginut tunniussaqarnissaanik USA-p piumasaqaatini taamaatikkaa, tusarfiit ilaat oqarpoq.

Allattoq Ritzau

februaarip 26-at 2025 09:03

Nutserisoq Mads Lynge

Ukraine USA-lu aatsitassat pillugit isumaqatigiipput. Ukrainep præsidentiata Volodymyr Zelenskyj-p allattoqarfiata Ukrainemi nutaarsiassaqartitsivimmut Kyiv Independentimut tamanna uppernarsarpaa.

Ukrainep USA-llu isumaqatigiissutaata tallimanngorpat atsiorneqareersinnaanissaa, Ukrainemi naalakkersuisunit tusarfiit nuimasut ilaata nutaarsiassaqartitsivimmut AFP-mut uppernarsarpaa.

Volodymyr Zelenskyj tallimanngorpat Washington D.C.-liassangatinneqarpoq, USA-p præsidentia Donald Trump tassani naapittussaallugu. Nutaarsiassaqartitsivik Reuters taama allappoq.

Ukrainep naalakkersuisuisa oqaaseqartitaata nuimasup oqarnera naapertorlugu isumaqatigiissummi immikkuualuttut Ukrainep akerlerisai USA-mit peerneqarsimapput.

Aamma atuarukZelenskyj: Ukraine isumannaallisaaneq pillugu USA-mik isumaqatigiissussiornissamut piareersimavoq

Ukraine aatsitassanik qaqutigoortunik 500 milliardit koruunit nalinginut USA-mut tunisaqassasoq ilaatigut isumaqatigiissutaagaluarpoq. Tassa 3555 milliardit koruunit missaat.

USA Ukrainemik 2022-mili assigiinngitsutigut ikiorsiivoq, sakkussianillu amerlasuunik aamma tunissuteqartarsimalluni.

Donald Trumpip nammineq oqarnera naapertorlugu USA Ukrainemut ikinnerpaamk 300 milliardit dollarinik tunissuteqarnikuvoq.

Volodymyr Zelenskyj-lli oqarnera naapertorlugu USA Ukrainemut 100 milliardit dollarit nalinginut tunissuteqarsimavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.