Politiit ullormut nalunaarutaat: Ukiukitsoq Ilulissani imigassartorsimalluni biilinik ingerlatsisoq unitsinneqartoq

Ilulissani nukappiaraq 15-inik ukiulik arfininngornermut unnuaani, marluk qeqqaliivissoq, innuttaasup nalunaarutiginninnerata kingorna politiinit unitsinneqarpoq.

Nukappiaraq aalakoorluni biilimik aallarusseriarluni biilertoq paasinarsivoq, Kalaallit Nunaanni politiit pigaartuisa pisortaat Carl Sværd oqarpoq.

- Taamaammat biilimik aallarussisutut imigassartorsimatillunilu biilinik ingerlatsisimasutut unnerluutigineqarpoq, nukappiaqqap ukiukitsuunera pissutigalugu isumaginnittoqarfimmut nalunaarummik tunniussisoqassaaq, Carl Sværd oqarpoq.

Sisimiuni biilimik ajutoorneq

Sisimiunittaaq imigassartorsimatilluni biilimik ingerlatsisoqarpoq. Tassani ullaaq arfineq-pingasunut qiteqqutilernerata missaani biilimik ajutoortoqarpoq, politiit pigaartuisa pisortaat oqarpoq.

- Angut arnarlu ullaaq biilertillutik ajutoorput. Biilimik ajutoornermik kingorna qimaapput, maannali Sisimiut peqqissaavianut unitsinneqarsimalerput, politiit pigaartuisa pisortaat oqarpoq.

Inuit taakku marluk, imigassartorsimatillutik biilimik ingerlatsisuullutik anniaateqaramillu, namminneerlutik politiinut sianersimapput nassuerlutillu.

- Taamaattumik biilimik ingerlatsisoq – angut 24-nik ukiulik- imigassartorsimatilluni biilimik ingerlatsisimasutut unnerluutigineqarpoq, politiit pigaartuisa pisortaat oqarpoq.

Angutip arnallu qanoq sukkullu ajoqusersimaneri oqaatigissallugit suli siusippallaarpoq.

Uummannami ujaasineq

Uummannami sisamanngormat unnukkut, qamuteralammik sikukkut imaanut nakkartoqarsorinnittoqarnerani annaassiniarnermik aallartitsisoqarnerani, inummik maqaasisaqartoqannginneranik suli nalunaartoqanngitsoq, politiit pigaartuisa pisortaat oqarpoq.

- Inummik maqaasisaqartoqarneranik suli nalunaarfigineqanngilagut, neriuutigilluinnarparpullu inummik sikukkut imaanut nakkartoqarsimannginnissaa, Carl Sværd oqarpoq.

Upalungaarsimasut politiillu maanna ujaasinngitsut aamma oqaatigaa.