Tusagassiuutit: USA-mi atorfilittat nunatsinnut immikkuullarissumik isumaqatigiinnissamik neqeroorniartut
Amerikami atorfilittat naalakkersuisut USA peqatigalugu free associationimik isumaqatigiissuteqarsinnaaneranik neqeroornissartik isumaliutigaat.
Amerikami atorfilittat marluk inullu alla isumaliutinut ilisimasalik nutaarsiassaqartitsivimmut Reutersimut oqarput. Inuit pineqartut atiminnik isertuussipput.
Isumaliutersuutigineqartut pisortatigoortumik uppernarsarneqanngillat.
Amerikamiut præsidentiat, Donald Trump, qaammatini arlalinni nunatsinnut soqutiginninnerminut takutitsisaarpoq, ilaatigullu sakkutuulersornissaq mattunnagu oqaatigaa. Nunarpullu pisiarinissaa aamma siunnersuutiginikuuaa.
Nunatta USA-mit aqunneqalernissaa naalakkersuisunit danskillu naalakkersuisuinit sakkortuumik akerlilerneqarnikuuvoq.
Free associationimik isumaqatigiittoqassagaluarpat nunarput USA-mut ilanngutissanngilaq.
Pilersaarut taannaannaanngilaq
Naalagaaffiit namminersortut marluk suleqatigisinnaaneri KNR-ip siuliani allaaserinikuuaa, tassanilu nunap akisussaaffiit nunamut allamut tunniussinnaallugit.
Periuusissiaq Sorsunnersuup Aappaata kingorna FN-ip nunasiaataajunnaarnissamik periasissiatut saqqummersinnikuuaa.
Taamatut isumaqatigiinneq nunamiit nunamut assigiinngissinnaavoq, assersuutigalugu USA-p inuiaqatigiit atugassarititaannut akisussaasuusinnaavoq, USA-lli sakkutuui nunami pineqartumiissinnaallutik. Taamatullu isumaqatigiittoqassappat USA-mut niueqateqarneq akitsuusigaanngitsuusinnaavoq.
Danmarkip USA-llu 1951-imi illersornissamut isumaqatigiissutaat naapertorlugu amerikamiut sakkutuui nunatsinniissinnaatitaapput.
Free associationimik isumaqatigiissuteqarneq allatigut ajornartorsiuteqalersitsisinnaasoq, tusarfiit isertortut oqaatigaat. Pilersaarulli taannaannaanngitsoq USA-mit isumaliuutigineqarpoq.
Siunnersortit ilaasa free associationimik isumaqatigiinnissaq siunnersuutigisimagaat, Reuters siuliani allannikuuvoq. Siunnersuulli The White Housemit isumaliuutigineqarnera siornatigut allaaserineqarnikuunngilaq.
The White House, Danmarkip Washington D.C.-mi ambassadea Nunattaluunniit sinniisuunera Reutersip saaffiginnissutaanut akissuteqanngillat.
USA-lli qallunaat naalakkersuisui free associationimik isumaliuuteqarlutik saaffigisimanngikkaat, europami atorfilittap kinaassutsiminik isertuussisup oqaatigaa.
/ritzau/Reuters
