Tusaanngami oqaloqatiginninniarnermi sumiorpaluutit ilungersunartorsiortitsisartut

Meeqqat inuusuttullu Siunnersuisooqatigiiffiat Sorlak inuusuttunik maajip aallaqqaatannit pingajuat ilanngullugu naapisitsimmat inuusuttut takorluukkatik, misilittakkatik ernumassutitillu oqaluuseraat.

Oqallinnermi inuusuttunit Tusaanngap atorneqarnera killeqartoq oqariartuutigineqarpoq, tassanilu nammineq oqaatsiminnik atuisinnaannginnertik paasineqartutullu misigisannginnertik oqariartuutigigaat, inuusuttut oqallinneranni nalunaarusiami allaqqavoq.

Tamannalu ajornartorsiut Tusaanngami aamma ilisimaneqartoq Tusaanngami allaffimmi pisortaagallartoq Linda Hegelund KNR-imut oqarpoq.

- Tassa taanna unammilligassaq nalunngilarput aamma tunuminngaanniit imaluunniit Qaanaaminngaanniit sianertoqaraangat Tusaanngami sulisugut paasinnissinnaanertik tamaat atorlugu paasinninniartarput, Linda Hegelund oqarpoq.

Tusaanngami sulisussaaleqisoqartoq

Sumiorpaluutit atorlugit oqaloqatiginninniarnermi paasineqanngitsutut misigisarneq kisimi ajornartorsiutaanngilaq, Tusaanngamimi ulloq unnuarlu sulisoqarniarneq aamma ilungersunartoq Linda Hegelund oqarpoq.

Tamannalu ajornartorsiut aaqqinneqassappat sulisunik inulerinermik ilinniarsimasunik, tunumiutut avanersuarmiutullu sumiorpaluutilinnik aamma amigaateqarput.

- Sulisoqarpugut arlalinnik sivisoorujussuarmik sulinikut aamma nutaaqarpoq. Kisianni unnukkut ammanissaanut sulisussamik pissarsiniarneq ilungersunartarpoq, taanna oqarpoq nangillunilu:

- Napparsimasoqaraangat sulinngiffeqartoqaraangallu sulisussarsiorneq ilungersunarnerusarpoq, sulisut ilai sulinerulersinnaasarput, taamaammat ullormiit ullormut nalimmassaannavippugut, taanna oqarpoq.

Tusaannga ulloq unnuarlu 2023-imi ammasalerpoq. Sulili Tusaannga ineriartortoq, ajornartorsiutillu aamma eqqumaffigineqartut Linda Hegelundip oqaatigaa.

Massakkumuugallartoq aaqqiissutissaqanngitsoq

Meeqqat Inuusuttullu Siunnersuisooqatigiiffiat Sorlak inuusuttunik naapisitsinerminni inuusuttut tarnimikkut peqqinnerulissangunik periarfissaqarnerunissaat oqariartuutigaat.

Tusaanngalu periarfissatut pingaarutilittut oqaatigaat, inuusuttunilli atorneqarnera killeqartoq, nalunaarusiami allaqqavoq.

- Taamaakkaluartoq inuusuttunut ilaatillugu atorneqarnera killeqarpoq, tassami sumiorpaluutit assigiinngitsut aporfiusarmata, Meeqqat Inuusuttullu Siunnersuisooqatigiiffiata nalunaarusiaani allaqqavoq.

Inuusuttut pisariaqartitatik aallaavigalugit ikiorneqarnissaat qulakkeerneqartariaqartoq aamma allaqqavoq.

Tamannali suli iliuuseqarfigisinnaanngikkitsik Linda Hegelund oqarpoq.

- Ajoraluartumik massakkuugallartoq iliuusissanik ersarissunik peqanngilagut. Taanna aamma sulisussarsiornermi qinnuteqartitsigaangatta imaluunniit qinnuteqartitsinngikkaangattaluunniit tunuminngaanniit imaluunniit Qaanaaminngaanniit sumiorpaluutinik atuisinnaasunik naammattuuineq ajorpugut.

- Aamma Tusaanngami sulissagaanni suna ilinniagarinerlugu apeqqutaagami imaluunniit inulerinermik misilittagaqarluarsimaneq, Linda Hegelund oqarpoq.

Tusaanngamut saaffiginnissimasut siorna 2025-mi 8.000-it sinneqarput, ukioq mannalu januarimiit maajimut 3.400-ungajaat saaffiginnereersimapput.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Marianne Paviasen Jensen (IA) oqaaseqartinniarlugu KNR-imit attavigaarput maannamulli akissuteqanngilaq.