Tunumi sorsunneq ilisimasuut misissorpaat

Qanga Inuit nunaqarfigisimaasa assanneqarnissaat pillugu itsarnisarsiooq Jens Fog Jensen Tunup avannaaniippoq, qimatallu Eskimonæsimiittut siumorpai:

- Illukut tammavissimanngitsut paasilerpara, illuallu taamanikkut 1943-mi ikuallammat atortut assigisaallu nikisinneqarsimanngitsut paasilerlugu, itsarnisarsiooq Jens Fog Jensen oqarpoq.

Taanna ilisimatusaat "Kampen om Vejret", oqaluttuarisaanermik ilisimatusartoq Tilo Krause peqatigalugu suliaraa.

Sorsunnersuup aappaanni sakkutuut marluk Kalaallit Nunaanni toqutaapput, toqutaasullu aappaa Eskimonæsimi toqutaavoq.

Tyskit silasiorfimmik isertuussamik pilersitsisimanerat iligiinnit paasineqareersorlu akersuuttoqarpoq. Tyskit Eskimonæs kingorna saassuppaat:

- Inuit pingasut qimusserlutik marsip ulluisa 23-anni Eskimonæsiliarsimapput. Eskimonæsip illersorneqarnissaa pillugu inuit allat aaneqarnissaat sakkutuut allat isumagisimavaat, sulili utersimanatik. Tyskit sakkutuut arfinillit taamanikkut saassussipput, inuillu pingasut taakku Eskimonæsiliarsimasut silasiorfimmit qimaasimallutik. Tyskit silasiorfimmik tiguaapput, ullorlu ataaseq tassaneeriarlutik angerlaqqissimallutik. Illulli amerlanersaat angerlartinnatik ikuallassimavaat, oqaluttuarisaanermik ilisimatusartoq Tilo Krause oqarpoq.

Qallunaalli allat taakku ikiortissamik aallersut tyskit Eskimonæsimik tiguaasimanerat ilisimanagu tassunga utersimapput. Siulliulluni tikiuttoq, Eli Knudsen, aallaaneqarpoq, allallu marluk, Marius Jensen aamma Peter Nielsen tigusarineqarlutik.

Silasiorfiup aserorneqarneranut atatillugu tyskit akisussaasuunerusut, ilisimatusaatip "Kampen om Vejret"-ip uppernarsisippaa.

Tyskit suli silasiorfimmiissorineqaramik iligiinnit qaartartumeeriarneqarput, eqqorneqarnatilli:

- Tyskit Eskimonæsimi sunik suliaqartarsimanersut atuarneqarsinnaavoq, suullu aserortersimaneraat aamma takuneqarsinnaalluni. Amerikamiut qaartartumeerinerminni illunik eqquisimanngitsut aamma takuneqarsinnaavoq, Jens Fog Jensen oqarpoq.