Trumpip Iranimut sorsunnerup nalaani USA-p Natomut tapersersuinera nalornissutigileraa

USA-p præsidentiata Donald Trumpip USA-p Natomut tapersersuinera tallimanngormat qularileqqippaa.

USA-p sapaatit-akunnerini sisamani Iranimut sorsunnerani nunat Natomut ilaasortaasut Europamiuusut USA-mut sakkutooqarnikkut tapersersuiumannginnerat Trumpip, Floridami Miamimi aningaasaliisarneq pillugu ataatsimeersuarnermi, naammaginagu oqaatigaa.

USA-p nunanik allanik siunissami illersuiumaarneranik qularuteqalerpoq.

- Taakku illersorniarlugit dollarit milliardillit Natomut ukiumut atortarpavut, untritilikkaat, ikiorusuttuaannarpavullu. Maannali iliuuserisaat eqqarsaatigalugit taamaaliortariaqanngilagut, ilaa?

- Taakku uagutsinnik ikiuinngippata sooq uagut taakku ikiortariaqarpavut? Ikiunngilaatigut, Trump oqarpoq.

Isumaqatigiissummik qularuteqartoq

USA-p præsidentiata Nato pillugu aalajangersakkami immikkoortoq 5-imi allassimasumik - illersornissamut isumaqatigiissummi pingaarnertut tunngaviusumik - tassa nunamut Natomut ilaasortaasumut ataatsimut saassussineq Natomi nunanut ilaasortaasunut tamanut saassussinerusoq - malinninnissaminik qularinninnini arlaleriarluni oqaatigisarpaa.

USA-p Israelillu februaarip ulluisa 28-anni Iran sorsuffigaat. Trumpip Hormuzip kangerluata isumannaallisarneranut ilimi killermiut ikiuukkumannginnerat naammaginagu taamanimiilli arlaleriarluni oqaatigaa.

Hormuzip kangerliumarnga uuliamik gassimillu avammut tunisinermut pingaaruteqarpoq, kangerluullu amitsup Iranimit saassunneqarnera ajalusoortitsivoq.

Nunat amerlanerusut peqataaniarput, tigussaasunilli suli iliuuseqartoqanngilaq

Kangerluk aqqusaarlugu umiarsuarnik angallassineq sapaatit-akunnerini kingullerni unittooqqavoq, tamatumalu kingunerisaanik nunarsuarmi tamarmi nukissiuutit akitsoraluttuinnarput.

Europami nunat arlallit - ilaatigut Tuluit Nunaat, Frankrig, Tyskland Danmarkilu - Hormusip kangerluani isumannaallisaanermut peqataaniarlutik oqarput. Sulili aalajangersimasumik tigussaasumik iliuuseqanngillat.

Trumpip Ruslandip præsidentia Vladimir Putin Europami Natomut ilaasortaasut illersornissamut "naapertuilluartumik akiliiumanngitsut" saassuteqqullugit 2024-mi qinersisoqarnerani kajumissaarpaa. Nutaarsiassaqartitsivik Reuters taama allappoq.

USA-p EU-llu attaveqatigiinnerat 2026-mi ajorsiartuinnarpoq, Trumpimmi Kalaallit Nunaata tiguarnissaanik sioorasaarinini sakkortusimmagu.

//Ritzau