Trumpip inunngornermi innuttaassuseqarnissamik pisinnaatitaaffik killilersorniarsareqqippaa

USA-p præsidentia Donald Trumpip inunngornermi innuttaassuseqarnissamik pisinnaatitaaffik killilersorniarsareqqippaa.

Præsidenti inunnut, Trumpip isumaa malillugu takornariartuusaarlutik meerartaariartorlutilli tikerartartunut, peqqussummik sisamanngormat atsiorpoq.

-Inunnguuseralugu innuttaassuseqarneq asuli pivaat, Trump præsidentip illorsuani allaffimmini tusagassiortunut taama oqarpoq.

- Naapertuilluannginneruallaaqimmat iluarsiissuteqarpugut, præsidentip ilanngullugu oqaatigaa. 

Præsidentip illorsuanit, inuit meerartaarnissaminnik eqqarsarlutik USA-mut takornariartuusaartartut inuunertik naallugu nunamut tikeqqinngisaannartussanngortinneqarsinnaanerat paasissutissiissutigineqarpoq, nutaarsiassaqartitsivik Reuters taama allappoq. 

Peqqussummi allassimasoq naapertorlugu, USA-p nunami namminermi isumannaallisaanermut ministeriata nunamit allamit innuttaassusilik inunnut ikiuiniarnissamik tunngavilersuuteqarluni tikeraarpat USA-mulluunniit iluaqusiiniarnermut tunngavilersuuteqarluni tikeraarpat immikkut akuersissuteqarfigisinnaavaa.

Trumpip suliniutaa Amerikami eqqartuussiviit ilungersunassangatippaat

Tænketanken Center for Immigration Studies – Avataanit nunasisartunut misissuisarfik ikinnerusunik nunasisoqartarnissaanut suliniuteqartoq, 2020-mi misissueqqissaarnermini anaanaasut 20.000-init 25.000-inut amerlassusillit ukiup ataatsip ingerlanerani, 2016-ip ilaani 2017-illu ilaani, meerartaariartorlutik USA-mut tikerarsimanerat missingersuusiorpoq. Tamanna Reuters taama allappoq. 

USA-mi 3,6 millioninik i 2025-mi meerartaartoqarsimanera nalunaarsorneqarpoq. 

USA-mi eqqartuussiviit qullersaata, Trumpip inunngornermi innuttaassuseqarnissamut pisinnaatitaaffeqarneq, inatsimmi tunngaviusumi illersorneqaraluartoq, killilersorniarlugu siornatigut misiliigaluarnera juunip naanerani itigartitsissutigaa.

Trumpip angajoqqaat unioqqutitsillutik USA-mut nunasisimanerminni meerartaartut meeraat piffissamiluunniit aalajangersimasumi visaqarlutik USA-miinnerminni meerartaartut meeraat ingerlaannaq Amerikamiusut innuttaassuseqarsinnaannginnerannik peqqussut siorna atsiorpaa. 

USA-mi eqqartuussiviit appasinnerusut, Trumpip, USA-p tunngaviusumik inatsisaani aalajangersakkat 14-iannut allannguuteqarnissamik pilersaarutaanik siullermik mattuppaat. 

Inatsimmi tunngaviusumi allaqqavoq, inuit Amerikap nunataani inunngortut tamarmik Amerikamiusut innuttaassuseqartut. 

Eqqartuussiviit qullersaat aalajangiinermut tassunga isumaqataasimavoq. 

Trumpip nunasisut ikilisarniarlugit inunngornermi innuttaassuseqarnissamik pisinnaatitaaffeqarnerup killilersorniarsarinera pingaartumik salliutissimavaa. 

Trumpip suliassaqarfimmi politikkiani, nunasisunik allagartaqanngitsunik millionilikkaanik nunamit anisitsineq ilaatigut ilaavoq. 

RITZAU/AFP