Trump oqaloqatigiinnerit ingerlanneqarneranni, Iranimut saassussinissamik siorasaareqqittoq

Iranip Kangerluup nerukinnera Hormuz qanittukkut ammaqqinngippagu nuna ”sakkortuumik saassunneqassaaq”.

Nutaarsiassaqartitsivik AFP-p allaaserisaa naapertorlugu, USA-p præsidentia Donald Trump Californiami tikeraarnermini Fox Newsimit apersorneqarami taama oqarpoq. 

- Iliuuseqarnissaq kisimi pingaaruteqarpoq. Isumaqatigiissuteqarusuppullu. Susoqassanersoq takussavarput. 

- Piffissaqaqaanga, taanna oqarpoq. 

Kangia Qiterlermi qaammatini arlalinni saassussinerit unitsinniarlugit, Iranip isumaqatigiissuteqarusunnera taassuma erseqqissaatigaa.

- Oqaloqatigiilluarpugut, Trump oqarpoq. 

Suli isumaqatigiissuteqartoqanngitsoq

USA-p nunanut allanut ministeriata Marco Rubiop, Kangerluup nerukinneranut Hormuzimut tunngatillugu qanittukkut isumaqatigiittoqarnissaa neriuutigalugu marlunngornermi oqaatigaa. 

Amerikami aningaasaqarnermut ministerip Scott Bessentip marlunngornermi pingasunngornermiluunniit isumaqatigiittoqarsinnaanera CNBC-mut oqaatigaa. 

Tusagassiuutit Al Jazeerami allaaserineqartoq naapertorlugu, Trump sorsunnerulli februaarip 28-anni aallartinnerani Iranimut saassussiniarluni arlaleriarluni sioorasaarisimavoq, tamannali pisimanngilaq. 

Kangerluup nerukinnera Hormuz ammarneqaqqinngippat, USA-p Iranip nukissiorfii saassutissagai marsimi taassuma oqaatigeqqaarpaa. 

Iran USA-mut saammaasseqatigiinnissamut isumaqatigiissuteqartariaqavissutut, Trumpip arlaleriarluni taagortareerpaa. Isumaqatigiissuteqarnissallu qalliartornera arlaleriarluni aamma oqaatigisarlugu.  

Tamanna erngertumik iliuuseqarnerussasoq martsimi oqaatigaa.

- Sapaatip akunnerini sisamanit tallimanut naatsorsuutigisimavarput sivisunerusinnaavorli, taanna oqarpoq. 

Isumaqatigiissutip annerpaartai Iranimik isumaqatigiissuteqarfiusimasut Al Jazeeramut siullerpaamik marsip 23-anni oqaatigaa. 

Qaammatit tallimat sinnerlugit sorsunnermi suli isumaqatigiissuteqartoqanngilaq.

Kangerluup nerukinnera Hormuz niuernikkut umiarsuarnik angallannermi pingaarnersat ilaanniippoq. Nunarsuarmi uuliap gassillu 20 procentii, sorsuttoqanngikkallarmat, kangerluatigoortarput. 

RITZAU