Trump Apple-imut tatsip aqqanik allanngortitseqqusilluni niueqatigiinnikkut akerleriissuteqartoqarnerani kimigiisertoq
Amerikamiut præsidentiata Donald Trumpip qarasaasialerinerup tungaatigut nuimasoq Apple, Lake Ontario suliffeqarfiup nittartagaanni Lake Americanngorteqqullugu qinnuigaa.
Tuluit nutaarsiassaqartitsiviat BBC-p nutaarsiassiinera naapertorlugu USA-mi nunamut namminermut ministeri Doug Burgum taama oqarpoq.
Burgum Fox Businessip aallakaatitassiaani Mornings with Mariami apersorneqarluni oqarpoq, "præsidenti Apple-imut toqqaannartumik saaffiginnissimasoq“.
- Qanittukkut allanngortoqarumaarnera qularinngilara, nunamut namminermut ministeri BBC-p nutaarsiassiinera naapertorlugu oqarpoq.
Lake Ontario - danskisut taallugu Ontariop tasia - USA-p Canadallu akornanni tasersuit killeqarfimmiittut minnersaraat, nunallu taakkua marluk akornanni niuernikkut atinillu aalajangersaanermi maanna akerleriissutaavoq.
Isumaqatigiinniarnerit unittooqqasut
Trumpip USA-p Canadallu niuernikkut isumaqatigiinniarneri qanittukkut ajalusoormata USA-mi aqqit allanngortinneqassasut peqqussutigaa.
Canada USA-lu , USA-p Canadami nioqqutissat aalajangersimasut 50 procentimik akitsuusermagit, sapaatip-akunnerini arlalinni akitsuutinik isumaqatiginninniareerlutik isumaqatigiissuteqanngillat.
Canadap tamatuma kingorna nioqqutissat USA-meersut arlallit septembarip arfineq-pingajuannit atuutilersumik aamma akitsuuserpai.
Google Mapsimi tatsip taaguutaa atuisuntu Amerikamiunut allanngortinneqareersimavoq, Lake Americamik taaguuteqalerluni.
Præsidentip peqqussutaa GNIS-imut - Geographic Names Information System-imut, USA-mi sumiiffiit atiinik paasissutissiisartumut tamanut ammasumut -sunniuteqarpoq.
Googlep USA-mi tatsip taaguutaa tamanna pissutigalugu allanngortippaa. Taseq atuisunut Canadameersunut Lake Ontariotut suli allaqqavoq.
Trumpip nunat nunaminertallu USA-p ataaniinngitsut arlallit, ilaatigut Kalaallit Nunaat, præsidentiunermini soqutigilluarpai.
Lake Ontario taassuma USA-mi taaguutinik allanngortitaani siullersaanngilaq. Taassumammi Mexicop Kangerliumarnga GNIS-imi Amerikap Kangerliumarnganik taaguuteqalersippaa.
Amerikap præsidentiata Canada USA-mi naalagaaffiit 51-issaattut inissinneqartariaqartutut arlaleriarluni oqaatigaa.
