Timmisartortartut saqisullu eqqissiallapput

- Ajunngeqaagut, aamma eqqissiallaqaagut timmisartumi aquttut Air Greenlandilu akunnerminni isumaqatigiissuteqarsimammata, Anders Mark Jensen timmisartortartut saqisullu kaffuffianni ACU-mi siulittaasoq mattusisisoqarunnaarnerata kingorna eqqissiallassimaqaluni qarpoq.

Tamanna pillugu Anders Mark Jensen aperaara, nalunnginneraa Air Greenland aamma timmisartortartut peqatigiiffianni akunnerminni qanoq ukiumut aningaasarsiat pillugit isumaqatigiissuteqarsimanersut akivorlu:

- Nalulluinnarpara qanoq isumaqatigiissusiorsimanersut, aamma nalunngitsuugukku tamanna oqaaseqarfiginavianngikkaluarpara, Anders Mark Jensen oqarpoq.

ACU-mi tassa timmisartortartut saqisullu kaffuffianni siulittaasumit Anders Mark Jensenimit uku ullut arfinillit timmisartortartunik mattussinerup piffissap ilua piffissanerarpaa toqqisisimananngitsoq. Taamatullu timmisartunik mattussinerup nalaani timmisartumi saqisut sallunaveeqqutitut atorneqartutut misiginarsimanerarlugit.

- Mattussineq suli aallartinngikkallarmat Air Greenlandilu attaveqaqatigiilluarsimavugut, ajunngitsumillu suleqatigiilluta. Tamannami aamma ingerlaannassaaq, kisianni oqaatigissavara piffissaq ingerlalaaqqaassammat tatigeqatigiileqqivinnissap tungaanut, Anders Mark Jensen oqarpoq.

Aqutsisut suli tatigaassigit?

- Aap soorunami, aamma allatut ajornartumik tatigisariaqarpavut. Kisiat nassuerutigissavara, aqutsisut pissusilersuutigisimasaat tulluusimaarutiginnginnatsigit.