Oqaluttuarisaanermut ilannguttut: Tilluuttartut amerikameersut Nuummiullu tilluutilersut

Tilluuttartut Brooklynimiit, Queensimiit aamma New Jerseymeersut arfininngornermi unnukkut tilluuttoqarnissaanut atatillugu Nuummi tikeraarput.
Allattoq Noah Mølgaard
maajip 04-at 2024 14:25

Arfininngornermi unnukkut arfineq pingasoriarluni Nuummi Illorsuaq Timersortarfimmi tilluuttoqassaaq.

Pisussaq oqaluttuarisaanermut ilanngutissaaq tassami aatsaavissuaq tilluuttartut amerikameersut Nuummeersullu Nuummi tilluutilerput.

- Tilluuttartut nukittoqisut USA-miit tikipput. Uagulli aamma piareersimavugut. Una pisussaq siunnerfigalugu qaammatit arlallit sakkortuumik sungiusarpugut, Nuummi tilluuttartut peqatigiiffianni Fight Club Nanumi sungiusaasoq Mahmoud Menaie KNR-mut oqarpoq.

Unammisassaat amerikameersut aamma taamatut oqariartuuteqarput taakkulu unammiartitaat New Jerseymiit aamma New Yorkimi illoqarfissuup ilaani Brooklynimiit aamma Queensimiit aggersuupput.

- Tilluuttartut marluk New Yorkimeersuupput arfinillit New Jerseymeersuullutik. Pikkorissuupput aamma aggerfianni tilluuttartunut peqatigiiffippassuaqarpoq, amerikamiit tilluukkiat aqutsisuat Ryan Songalia KNR-mut oqarpoq.

Sorsuuttartut

Taassumali erseqqissarpaa amerikamiut tilluulluni unamminertigut misilittagaqarnerugaluartut ajugaareertoqanngitsoq.

- Tilluuttartut Nuummeersut sorsuuttartuissuupput unamminermut uummateqarluartut uagullu pissangavugut pisinnaasatta taakkununnga takutinnissaannut. Tungitsinniit oqinaariniartoqarnavianngilaq, Ryan Songalia oqarpoq.

Amerikamiit tikeraartoqarnissaq ukiut arlallit piareersarneqarnikuuvoq. Coronali nunarsuarmi tuniluutilermat pisussaq kinguarteqattaarneqareersoq periarfissaq maanna takkuteqqippoq.

Mahmoud Menaiep aamma qularinngilaa Nuummiut tilluuttartut amerikamiunut unamminerminni misilittakkatigut pissarsilluarumaartut.

Anniartoqassaaq

Amerikamiit tilluukkiat ilisimaneqarpianngitsuugaluarlutik taamaattoq tillueriaatsinik uppercutinik aamma hooksinik malugititsissaqqaarput.

- New Jerseymi aamma New Yorkimi iluanaarpugut tamaani tilluulluni unammisoqartuaannarmat. Tilluuttartut ilaat immaqa ukioq ataaseq marlulluunniit tilluuttareerlutik ilaatigut tallimarianngikkunik quleriarlutik unammereersimasarput, Ryan Songalia oqarpoq.

Taassuma qularutiginngilaa arfininngornermi unnukkut Nuummi Illorsuaq Timersortarfimmi tilluuttoqalerpat pikkusuttoqarumaartoq.

- Anniartoqangaatsiarumaarpoq. Nalunngilluinnarnarput isiginnaariat unammisassavut illersorumaaraat, uagulli aamma takutikkusupparput uaguttaaq sorsuuttartuulluta pisussarlu Nuummiut nersorniarlugit piumaartoq, Ryan Songalia naggasiivoq.

Tilluunneq arfininngornermi unnukkut nalunaaqutaq 20.00 aallartissaaq.