Telemi tillinniat suli tigusarineqanngillat
Tillinniat atortorissaarutinik nutaalianik 100.000 koruunit missaliorlugit nalilinnik tillipput. Assiliiviit alapernaarsuutit immiussigaluarput tillinnialli kiinnatik assersorsimavaat sulilu maanna tigusarineqaratik.
- Kisianni pisimasoq paasiniarlugu tamaviaarpugut. Aamma inuit tillinniarnermut ilisimasaqarsinnaasut qinnuigaavut politeeqarfimmut saaffiginnequllugit, Nuup politiivi nalunaarput.
Tillinneqartut ilagaat oqarasuaatit angallattakkit Nokia, Samsung Galaxy S II of III aamma oqarasuaatit Sony Ericsson kiisalu HTC Smart aamma Titan. Politiit erseqqissaatigaat tillitanik pisineq inerteqqutaammat pineqaatissinneqaataasinnaallunilu.
Nuummi politiit oqarasuaatigaat 321448.