Silap pissusiata allanngorarnera anorersuaqarnerulersitsisoq: Tasiilap 'nipaannerani' piteraleqqinnissaanut piareersartoqarpoq

Hendrik Andreassenip Tunumi anorersuit piteqqat arlallit takoreerpai. Amerlangaarmata kisissinnaanngilai.

Tunumi upalungaarsimanermut 2012-imili pisortaavoq.

Taassumap anorersuit piteqqat sakkortusiartornerat aamma malugisimavaa.

- Ukiakkut ukiukkullu taama pisoqartarnera meeraagallarama nalinginnaavoq, kiannerulernerali piterartarnera akulikinnerulerpoq, Hendrik Andreassen oqaluttuarpoq.

Kommuneqarfik Sermersooq ilisimatusartut eqimattat peqatigalugit Tasiilami ajornartoornermi aqutsinermut sapaatip-akunnera kingulleq sungiusartitsipput. 

Qatserisartut, politiit, pilersuisut nunallu immikkoortuani oqartussaasut ilisimatuut peqatigalugit Piterarnerani suulluunniit pisinnaasut sungiusarnermi piareersaqqissaarfigaat.

Jacob Tarupip ilisimatuut Norgemeersut Islandimeersullu peqatigalugit ilisimatusarnermik suliniut ARCHAIC aallartippaa. Taakku Issittumi silap pissusiata allanngorarnerani siunissamilu allanngorarnissaanut ajornartoornermi isumaginninneq misissorpaat.

Upalungaarsimasullu ataatsimoorlutik iliuusissaminnik tamakkiisumik ataatsimut suleqatigiinnerat isumassaqarluinnarpoq, Hendrik Andreassen oqaluttuarpoq:

- Ajunaarnersuaqaraangat qatserisartut, politiit peqqinnissaqarfillu eqqarsaatigineqartarput, kisianni aamma allarpassuit akisussaaffeqarput suliassamik oqilisaasunik, taanna oqarpoq:

- Oqartussaasut assigiinngitsut attaveqaqatigiinnerat pitsanngorsarneqarnissaanut tunngassuteqartorujussuuvoq.

'Inuit pikkorissut' misilittagaat

Hendrik Andreassenitut ukiuni 20-ni qatserisartutut upalungaarsimasutullu pisortaasimagaanni misilittakkat amerlapput.

Hendrik Andreassen anorersuit qanoq pinngoriartortarnerat silallu pissusiani suut eqqumaffigisassaanersut ilisimasaqarfigilluaannarnagit aamma misilittagartuujuvoq.

- Ajornartorsiuteqarfiusuniissimatillunga nalilersuisarpunga tullianilu qanoq pitsanngorsaasinnaanerlunga eqqarsaatigisarpara, tamannalu soorunami periutsitta pitsanngoriartortuarnermik kinguneqartarpoq, Hendrik Andreassen oqarpoq.

Tasiilarmiullu anorersuartarnera pillugu ilisimasaqarluarnerat pillugu illoqarfik ilisimatuunit soqutigineqarnerulerpoq.

Jacob Taarup Københavnimi ilinniarnertuunngorniarfimmi lektoriuvoq, Issittumilu inuiaqatigiinni avinngarusimasuni ajunaarnersuaqartillugu qanoq iliortoqartarnersoq pillugu nunanit tamalaanit peqataaffigineqartumik ilisimatusarnermik suliniummik annertuumik maannakkut suliaqarluni.

- Tasiilami inunnik pikkorissorpassuaqarpoq, taamaattumillu taakkuninnga sungiusaqateqarneq nuannersuuvoq, Jacob Taarup ajornartoornermi aqutsinermut sungiusarneq naammassisoq pillugu oqarpoq:

- Ilisimatusarnikkut suliniuteqarnerup matuma ilaanut ilaavoq Issittumi sumiiffinnut allanut, silarluttarnerani misilittagaqarfiunngitsunut, misilittakkanik avitseqatiginninnissaq.

Pingaarutillit pitsaasullu amerlasuut eqqartorneqarmata, inuit ataatsimiinnerup kingorna qasupput, upalungaarsimanermut pilersaarusiortoq Annamaria Vang oqarpoq.

Aammattaaq sungiusarnermi Piterap allanngoriartornera qanoq ilungersunartoqartitsisinnaanera sammineqarpoq aamma suut immikkut eqqumaffigineqartariaqarnersut.

Aammattaaq sungiusarnermi Piterap allanngoriartornera qanoq ilungersunartoqartitsisinnaanera sammineqarpoq aamma suut immikkut eqqumaffigineqartariaqarnersut.

- Suli aputeqalinngitsoq sikusimanngitsorlu piteraraangat, anorersuarnerani umi tamaani tinngussaasinnaasorpassuaqartarpoq. Illoqarfimmilu imeqarfik ataasiinnaavoq taannalu anorersuarnerani mingutsinneqarsinnaavoq, Jacob Taarup oqarpoq nangillunilu:

- Aamma nunaqarfinnut attaveqaatit nalinginnaasut ajoquserneqarsinnaanerat misissorparput.

'Nipaannerani' pilersaarusiorneq

Tasiilarmiulli ajornartoornermi aqutsinermut sungiusarneq pissutigalugu ernumasariaqanngillat.

- Oqartussaasutut ajunaarnersuaqarnissaanut piareersimalluta sungiusartarnerput tamatumunnga takussutissaavoq, Annamaria Vang, Kommuneqarfik Sermersuumi upalungaarsimanermut pilersaarusiortartoq oqarpoq.

- Innaallagiaarukkaangatta inuit sumunnassappat, ajornartoortoqartillugulu innuttaasut qanoq attaveqarfigissanerigut. Tamakku ajornartoortoqannginnerani eqqarsaatigisarpagut ajornartoortoqalerpat aatsaat pinnata. Sungiusarneq oqartussat akornanni suleqatigiinnerup pitsanngorsarnissaanut aamma tunngassuteqarpoq.

Tasiilami ilisimasanik aallerfissarpassuaqarpoq, ilisimasalli tamatigut allattorneqartuanngitsut taanna oqaluttuarpoq:

– Illoqarfimmimi inuit imminnut ilisarisimaqaat, taamaattumik assersuutigalugu, imminnut attavigeriaannaanngikkaanni angerlarsimaffimmut kasuttortoqartarpoq. Nipaatsumik ilisimariikkat pilersaarutinngorlugu allattorneqarneq ajorpoq, pisoqartilluguli iluaqutaasinnaavoq.

Taamaattumik Annamaria Vang ajunaarnersuaqartillugu qanoq iliortoqarsinnaaneranik pilersaarusiorluni suliaqarnini aamma nangippaa.

Jacob Taarup qanoq ingerlasoqarnera nalilersorniarlugu Tasiilamut qaammatialuit qaangiuppata utissalluni oqaluttuarpoq. Ilisimatusarnermi suliniuteqartut nunatsinni qaqqanik sisusoortoqartarnera misissorumallugu, Uummannami ajunaarnersuaqarneranit ukiut qulinngorneranit 2027-mi misissuiartussapput.