Ullormut nalunaarusiaq: Takornariaq Sisimiuni qaqqami ajunaartoq

Qaqqasiortartup pigisai Sisimiuni qaqqami qimaannarneqarsimanerisa kingorna qulimiguulimmit, politiinit, qatserisartunillu ujaasinermik aallartitsisoqarpoq.

Nalunaartup qaqqami pigisat qimaannakkat ungasinngisaanilu inuk nalasoq siumoramigit nalunaaqutaq 19.43 politiinut sianerpoq.

Angut qaqqami siumorneqartoq nunami allamiuuvoq, takornariaasimassangatinneqartorlu, politiini sillimasoq Poul Kreutzmann oqarpoq.

Qanoq pisoqarsimanera - aamma angutip qanoq toqusimanera - politiini sillimasup oqaaseqarfigisinnaanngilaa.

Tillinniartoqarlunilu imigassartorsimatilluni biilinik ingerlatsisoqartoq

Sisimiuni sumiiffimmi allami angut 30-t sinnerlugit ukiulik imigassartorsimatilluni biilinik ingerlatsisimasoq marlunngornermi ullaaralaakkut unitsinneqarpoq, eqqartuunneqassasorlu, politiini sillimasoq oqaluttuarpoq.

Politiini sillimasup Maniitsumi Pisiffimmi ataasinngornerup unnuaani tillinniartoqarsimasoq eqqaavaa. Qanga tillinniartoqarsimanersoq pinerluttullu sunik tillissimanersut oqaatigissallugu suli siusippallaartoq, politiini sillimasoq oqarpoq.

Pinerluttut Pisiffimmut iserniarlutik igalaaq aserorsimavaat, Pisiffiullu eqqaani pasinartumik unnuaq utakunnittoqarsimappat politiinut saaffiginnittoqarnissaa politiit kaammattuutigaat.

Oqarasuaat 70 14 48-mut sianerlutit politiit saaffigisinnaavatit.